LAPHA uThembinkoi Lorch wathathwa nomqeqeshi weMamelodi Sundowns uPitso Mosimane benqoba imiklomelo yokuvelela enyangeni

UGEZEKE inhliziyo umdlali we-Orlando Pirates, uThembinkosi Lorch, ethola imiklomelo emikhulu emcimbini wokubonga abadlali abashaye into ecokeme kwisizinika-2018/2019 ye-Absa Premiership esanda kusongwa obuse-Inkosi Albert Luthuli International Convention Centre, eThekwini ngeSonto ebusuku.


ULorch osanda kuphoxeka nozakwabo behlulwa isicoco se-Absa Premiership esigcine sihlwithwe yiMamelodi Sundowns, ugoduke nomklomelo weFootballer of the Season evotelwa abaqeqeshi kanjalo novotelwa abadlali iPlayer’s Player of the Season.

UTHEMBINKOSI Lorch owole imiklomelo


Lapha udlisele ogageni abadlali beMamelodi Sundowns, uHlompho Kekana noThemba Zwane.


ULorch ofike kwiPirates ngo-2017 esuka kwiChippa United ukhombise okukhulu ukudlondlobala ngaphansi kobuholi bomqeqeshi uMilutin “Micho” Sredojevic.


Nguyena ohambe phambili  kumaBhakabhaka ngokuwashayela amagoli kwiligi ngayisishiyagalolunye. Ubuye washaya amane ngesikhathi eZimnyama zifinyelela kowamanqamu weTelkom Knockout.




Eminye imiklomelo ihambe kanje:

* Goal of the Season: Vincent Pule (Orlando Pirates)

* MTN 8 Last Man Standing: Peter Leewenburgh (Cape Town City)

* Telkom Knockout Player of the Tournament: Elvis Chipezeze (Baroka)

* Nedbank Cup Player of the Tournament: Zakhele Lepasa (TS Galaxy)

* Nedbank Cup Most Promising Player: Terrence Mashego (TS Galaxy)

* Absa Premiership Young Player of the Season: Teboho Mokoena (SuperSport United)

* Absa Premiership Coach of the Season: Pitso Mosimane (Mamelodi Sundowns)

* Absa Premiership Midfielder of the Season: Hlompho Kekana (Mamelodi Sundowns)

* Diski Challenge Most Promising Precious Find: Sipho Chaine (Bloemfontein Celtic)

* Diski Shield Player of the Tournament: Siboniso Conco (Golden Arrows)

* Absa Premiership Goalkeeper of the Season: Ronwen Williams (SuperSport United)

* Absa Premiership Defender of the Season: Ricardo Nascimento (Mamelodi Sundowns)

* Referee of the Season: Abongile Tom

* Assistant Referee of the Season: Emmanuel De Sani