Kube nebohlololo iSpar Proteas ihluleka eNdebeni yoMhlaba ekhaya
ISIHLABANI futhi esingukaputeni weSpar Proteas, uBongiwe Msomi sixinwe wuJamie-Lee Price we-Australia, ezakhe ezingalibonanga elidlalayo eNdebeni yoMhlaba ebiseMzansi kulo nyaka u-2023 Isithombe: BACKPAGEPIX
ININGIZIMU Afrika isingathe okokuqala emlandweni iNdebe yoMhlaba ye-netball, ebise-International Convention Centre, eKapa, ngoJulayi kuya ku-Agasti.
Njengosokhaya balo mqhudelwano weNdebe yoMhlaba, iSpar Proteas njengamanje ekleliswe endaweni yesihlanu ngokwezilinganiso ze-INF World Rankings, bekulindeleke yenze kangcono, kwazise ngo-2019 yayifinyelele kweyandulela owamanqamu.
Elakuleli alizange lilibone elidlalayo njengoba ligcine liphuma kuma-quarterfinal. Leli qembu ebeliphekwa nguNorma Plummer ligcine lithole indawo yesithupha ekuklelisweni kwamaqembu abeyibambe kweyomhlaba.
I-Spar Proteas ibe isiwuvala kabi unyaka u-2023 obuvele ungabanga womuhle kuyona, ishaywa yi-England ngo 2-1 koweVitality Netball International Series ebidlalelwa eMotorpoint Arena, eNottingham, e-England, ngoDisemba 12.
Ngemuva kwalo mdlalo, uPlummer ube esememezela ngokubeka kwakhe phansi izintambo ekuqeqesheni ezingeni lamaqembu esizwe.
UPlummer (79) odabuka e-Australia, osemnkantshubomvu ekuqeqesheni, ubeseqeqeshe iSpar Proteas amahlandla amabili, kwazise wayefike okokuqala ngo-2015 ukuzoqeqesha leli qembu lesizwe, kwaze kwaba ngu-2019 eNdebeni yoMhlaba yase-England, baqeda endaweni yesine.
Ukhuze ibuya ngo-Okthoba 2022 ukuzolihola futhi iqembu emalungiselweni alo okuyodlala kweyomhlaba kodwa kwagcina kungahambanga kahle, lihluleka wukuthola indondo.
Yize enkundleni kungawalungelanga amaProteas ngokwemiphumela kodwa izindaba ezinhle, ezabadlali abathole amaqembu kumaligi aphesheya lapho lo mdlalo udlalwa khona ezingeni lesigaba esikhokhelayo.
Bayisishiyagalombili abadlali bamaProteas abasayiniswe ngamaqembu ahlukene ase-England, iScotland naseWales, adlala kwiNetball Super League.
U-Elmere van der Berg noShadine van der Merwe bazojoyina iManchester Thunder, uKhanyisa Chawane uzodlalela iCeltic Dragons kanti uLefebre Rademan uthathwe yiSevern Stars.
Iqembu elidle isicoco kulo nyaka, iLoughborough Lightning, likhethe uNicola Smith, uNichole Taljaard uzodlalela iLondon Pulse, u-Owethu Ngubane aye kuStrathclyde Sirens bese u-Ine-Mari Venter wajoyina iSaracens Mavericks.