IMAMELODI Sundowns iphonse inselelo emaqenjini azimisele ngokuyibangisa isicoco se-Absa Premiership ekupheleni kwesizini ka-2017/2018 ngesikhathi iqoqa amaphuzu agcwele emdlalweni wesine kulandelana.
ISundowns ibhudluze iBloemfontein Celtic ngo 4-1 emdlalweni wePremiership eLoftus Versfeld Stadium, ePitoli, izolo ntambama.
Amagoli eSundowns ashaywe nguThokozani Sekotlong noTiyani Mabunda, Percy Tau noThemba Zwane esiwombeni sesibili. EleCeltic lishaywe nguRonald Pfumbidzai.
ICeltic idlale ngaphandle komqeqeshi wayo oyivuse emaqandeni kule sizini, uVeselin Jelusic, iqembu eliveze ukuthi uyovuselela iziqu zakhe zokuqeqesha i-Uefa A Licence phesheya kwezilwandle.
ISundowns bekulindeleke ukuthi iqhubeke nomgqigqo wayo wokuqoqa amaphuzu. Ngaphambi komdlalo wayizolo ibikade isiwine imidlalo emithathu ilandelana nokuyenze yahlala esicongweni se-log yaphinda yavula igebe lamaphuzu ayisihlanu emaqenjini ayilandelayo.
Emdlalweni wayizolo, iSundowns iyona ehlasele zibekwa, kubhoke umdlali wasemuva uFares Hachi obegamanxa kwesokunxele noTapelo Morena kwesokudla. Ngomzuzu wesithupha umnyakazo weCeltic ucishe wathela izithelo ngesikhathi ibhola likaVictor Letsoalo lishaya ipali liphuma phezulu ekade esale emile unozinti weSundowns uDenis Onyango.
Sekusele amanenjana kuyiwe ekhefini uLetsoalo uhlulwe yithuba sekufanele aqedele ibhola ebelikade ligotshwe nguJacky Motshegwa kwesokunxele. Esiwombeni sesibili, iSundowns iqhubeke lapho kade igcine khona kwesokuqala.
Kusheshe kwathela izithelo ngomzuzu ka-47 ngesikhathi uSekotlong engqofela phakathi ibhola ebelikade ligotshwe nguTau kade kuyikhona kwesokunxele.
Emuva kwemizuzu eyisihlanu uMabunda ushayele iSundowns igoli lesibili emuva kwebhola alidlale ngaphandle kwebhokisi no-Oupa Manyisa. La magoli ayivuse emaqandeni iCeltic.
Ngomzuzu ka-75 uTau uqede wonke amathemba eSiwelele eshaya phakathi ibhola ekade elinikwe ngobunyoninco nguThemba Zwane. Sekusele imuzuzu emibili umdlalo uphele uZwane uzishayele elakhe.