Isinqumo sikaNabi sithambisele iPirates kowabakhaya
UMQEQESHI weKaizer Chiefs othwele kanzima uNsreddine Nabi
Image: BACKPAGEPIX
UKUGEMBULA kwenhloko yabaqeqeshi kwiKaizer Chiefs, uNasreddine Nabi, kuthambisele i-Orlando Pirates njengoba ingeke isabanayo inkinga yokwelusa omunye wabagadli baMakhosi abakhombisa izimpawu zokuvusa umhlwenga kulezi zinsuku uWandile Duba koweBetway Premiership ngoMgqibelo eNasrec.
UDuba owaba nesandla esikhulu ekunqobeni kweChiefs kowandulela owamanqamu weNedbank Cup neMamelodi Sundowns ngeke awudlale owabakhaya obhekwe ngabombu ngenxa yesigwebo samakhadi.
IChiefs nePirates bazoshukana kwiligi ngoMgqibelo ngo-3 ntambama e-FNB Stadium, eNasrec.
Kuzodlula izinsuku eziyisikhombisa baphinde bakhiphane inkani kowamanqamu weNedbank ngoMeyi 10 eMoses Mabhida Stadium, eThekwini.
UDuba osemncane kodwa okhombisa izimpawu zokuba nomfutho ohlukile kunozakwabo kwiChiefs ubengomunye wabane abaye koweMarumo Gallants ngempelasonto edlule besengcupheni yokweqiwa owabakhaya.
Ngomzuzu ka-45 isinqumo sikaNabi sokugembula ngoDuba simjikele kwazise lo mgadli uthole ikhadi eliphuzi obekungelesine okulandelwa isigwebo somdlalo owodwa.
Bebengekho koweGallants oGaston Sirino noPule Mmodi ngenxa yamakhadi.
O-Inacio Miguel, Tashreeq Mathews noMduzuzi Shabalala basesenkingeni yokweqiwa owamanqamu weNedbank kwazise banamathathu ngakho-ke kumele bazigade kowangempelasonto ezayo uma bebosheliwe.
Ngemuva kwalo mdlalo wangoMgqibelo iChiefs ephoxwe kuwona yiGallants yayikhipha nakwi-Top 8 uNabi uthe akuwona umphumela kuphela omshiye ekhathazekile kodwa izimpawu azibone kubadlali zimethusile.
“Kunomuzwa wokuphonsa ithawula kubadlali engiwuzwayo futhi awungihleli kahle,” kusho uNabi esithangamini nabezindaba athathe isikhathi ukufika kusona.
“Imbangela yokunilindisa wukuthi ngibone isidingo sokubachazela kabanzi abadlali bami ngobungozi bokuphonsa ithawula njengoba isizini isikanje,” kulandisa lo mqeqeshi kwabezindaba.
“Ithuba lokuhlenga isizini liphambi kwethu. Kufanele sinqobe kwiPirates kule midlalo emibili elandelayo esizoyidlala nayo ngokwahlukana. Uma senze lokho kuningi esiyobe sikuhlengile kule sizini.
“Kuzobanzima kakhulu ukwenza lokhu uma uzoqhubeka lo muzwa engiwuzwa kubadlali wokuphoxwa yimiphumela bese kuba sengathi baphonsa ithawula,” kusho uNabi.
Ayikho kwiChiefs kuphela inkinga yamakhadi ngoba noThalente Mbatha noPatrick Maswanganyi basengcupheni yokweqiwa owamanqamu nowangoMgqibelo kwazise banamathathu ngokwahlukana ekubeni besazobhekena neSekhukhune United (namuhla ngo-7.30 ebusuku e-Orlando Stadium, eSoweto).
Isiyonke imidlalo yeBetway Premiership imi kanje:
Kusasa
Orlando Pirates v Sekhukhune United, 7.30pm, Orlando Stadium; Mamelodi Sundowns v Richards Bay FC, 7.30pm Loftus Versveld; Stellenbosch FC v Chippa United 7.30pm Danie Craven Stadium.