Orlando Pirates (0)0
Bidvest Wits (0)1
KUBUYE ishobolo langesizini edlule kwi-Orlando Pirates ehlulwe ekhaya yiBidvest Wits emdlalweni we-Absa Premiership e-Orlando Stadium, eSoweto, izolo ebusuku.
Igoli eliqoqele iWits amaphuzu amathathu, ibhola lishaywe nguHaashim Domingo lashayisa kuGladwin Shitolo kwaba ngumkhonto ogwaze ekhaya ngesiwombe sesibili. Ukuhluleka ukuwina imidlalo ekhaya ekuqaleni kwesizini kwePirates yisifo esiyihlasele kanzima ngesizini edlule.
Sishaye sazwela kumqeqeshi uMilutin “Micho” Sredojevic obesazama ukuhlanganisa iqembu. Kusukela kuqale isizini iPirates isihluleke kathathu ukuwina e-Orlando Stadium.
Emdlaweni wokuqala wesizini ka-2018/2019, ibambane ngo 1-1 nomakoti beligi iHighlands Park. Ngempelasonto ikhishwe yiSuperSport United kwiMTN8 sekushaywa amaphenathi kuyona le nkundla. Ngesizini edlule iPirates igcine iphumelele emzuliswaneni wesibili ukuwina e-Orlando.
IWits, ebikade yamukela umqeqeshi uGavin Hunt okokuqala ebhentshini kule sizini emuva kokuqeda isigwebo sangesizini edlule, iqale ngesikimu esifanayo esiyiqoqele amaphuzu agcwele kwemibili yokuvula. Sihlule iFree State Stars neKaizer Chiefs ngokulandelana. Ngesizini edlule uHunt ugxekiwe ngokusayinisa inqwaba yabadlali abagcine bengamsebenzelanga.
Emdlalweni wayizolo, iPirates iqale ngesivuvu ifuna ukushaya igoli kuqala kodwa iWits ikhombisa ukuqina emuva. IZitshudeni bezikhombisa ukuba yingozi uma zithola ibhola. Ngomzuzu ka-13 unozinti wePirates, uSiyabonga Mpontshane uxhimfele phezu kwepali ibhola likaMxolisi Macupu ebelikade ligotshwe nguDeon Hotto kwesokunxele.
Emuva kokuncishwa indawo yokudlala, iPirates igcine ilitholile ithuba ngomzuzu ka-23 ngesikhathi uXola Mlambo edonsa imbumbulu yeshodi engaphandle kwebhokisi, kukade kuyi-free kick kodwa walithinta laphuma phezu kwepali unozinti weWits, uDarren Keet. Ngomzuzu ka-42 uKeet utakule iWits evimba ibhola likaJustin Shonga esebhekene naye emuva kwephutha elenziwe ngabadlali basemuva.
Esiwombeni sesibili iPirates iqhubekile nokufaka ingcindezi kodwa ihluleka ukwakha amathuba asobala okushaya amagoli. Nokho kucishe kwayilungela ngesikhathi ibhola likaPule alishaye engaphandle kwebhokisi lishaya ipali luphuma ngaphandle. Ngomzuzu ka-80 uDomingo ushaye ibhola elithinte uShitolo labhajwa enethini.