ISafa ituse Isolezwe ngokufaka isandla ebholeni
KUSUKELA kwesokunxele umhleli weSolezwe uThulani Mbatha, Samkelo Nkosi wakwaBB Premium Foods, Zama Buthelezi otisikhulu esiphezulu seSafa Ethekwini, Mazwi Mkhize ongumengameli weSafa Ethekwini noLucky Nkosi oyisikhulu soKhozi FM
Image: TUMI PAKKIES
UMENGAMELI weSouth African Football Association (Safa) kwisifunda saseThekwini, uMazwi Mkhize, utuse ukuzinikela kwephephandaba Isolezwe ukufaka isandla ekuthuthukiseni intsha ngomqhudelwano kanobhutshuzwayo wabafana namantombazane.
Isolezwe Soccer Cup yakulo nyaka eqala eyamaqoqo kwabesilisa ngoJulayi 7, yethulwe ngokusemthethweni izolo, eMushroom Lounge & Café, eMhlanga.
Kulo mcimbi obuhanjelwe amaqembu nabaxhasi balo mqhudelwano abahlanganisa yona iSafa Ethekwini, Mushroom, Premier Foods, aQualle nabakwaLOMS Events kuphinde kwaqhathwa kwabesilisa nakwabesifazane.
Amaqembu aphuma kuma-Local Football Association (LFA) angaphezulu kuka-20 adlala kwiSafa eThekwini, azodudulana kuze kuphume umakhonya ngoJulayi 13.
Ngokusho kukaPhumi Mkhize wakwa-marketing kwiSolezwe, intshontsho elidlalelwayo nekundla okuzogijinyelwa kuyona owamanqamu, kuzomenzeyelwa maduze.
Kwabesilisa eyamaqoqo iqala ngoJulayi 5, bese kuthi abesifazane asebedlale kwaze kwafikwa kuma-quarterfinal bona baqala ngoJulayi 12.
Isolezwe Cup yasungulwa ngo-2022, ngenhloso yokubhiyozela ukugubha kwaleli phephandaba iminyaka engu-20 liphakela abafundi balo izindaba.
KUSUKELA kwesokunxele, uZama Buthelezi weSafa Ethekwini, Thandeka Mthembu, Khwezi Ndlovu (Hashtag Solutions), Luyanda Ngcobo noMluleki Mlambisa emcimbini wokwethulwa ngokusemthethweni kweSolezwe Cup
Image: TUMI PAKKIES
UPhumi Mkhize uthe kwakungathi kuzoba yinto yonyaka owodwa ngesikhathi lo mqhudelwano uqala kodwa kuyamthokozisa ukuwubona ulokhu uqhubeka njengoba uzobe udlalwa okwehlandla lesithathu.
“Siyabonga ukuthi buyaqhubeka ubudlelwano esabakha neSolezwe ngoba isikhathi esiningi uma indlu emnyama ithi iyahlangana, uthi uyezwa kuthiwe sekonakele ungabe usazi ukuthi sekwenzenjani,” kusho yena.
“Njengoba sekuwunyaka wesithathu kusho khona ukuthi inqola iyaqhubeka ngoba kwaqala sengathi kuzoba yinto eqondene nemibhiyozo yeminyaka engu-20 bese kuyaphela,” usho kanje.
Lesi sikhulu sikhumbuze leli phephandaba ngobumqoka bokuwuqopha phansi umlando wabadlali abakhiqizwa yiSolezwe Cup ngoba inhloso enkulu ukubakhomba ngomuso.
“Sekuyisikhathi sokuthi sikhombe ukuthi nangu umdlali owakhiqizwa yilo mqhudelwano. Ngisho angayedwa kodwa sekuyisikhathi sokukubaqopha phansi abadlali abakhiqizwa wumqhudelwano ukugwema ukuphucwa umlando omuhle ngokuzayo.
“Ibhola akulona elokudlalwa kuphela kepha liyisikhali sekusasa eliqhakazile ngoba lifundisa ukuqoqeka. Siyabonga ngesandla seSolezwe ekunciphiseni izigqila zezidakamizwa ezisuke zinamakhono ahlukene futhi zisavunywa nayiminyaka.
Umhleli omkhulu weSolezwe, uThulani Mbatha, uthe inhloso enkulu yikhona ukufaka isandla kubafundi bephephandaba nokuvusa ubungani nezinhlaka eziningi abaxhumene nazo.
“Iphephandaba lethu lifisa ukuhlala lixhumene nabafundi balo. Liyaqonda futhi ukuthi unobhutshuzwayo uyingxenye enkulu yabo (abafundi) ngakho-ke lo mqhudelwano ungenye yezindlela zokukhulisa ukuxhumana,” kusho uMbatha.
“Siyabonga kubona bonke abazihluphayo ngokusisiza ukuthi Isolezwe Cup ibe yimpumelelo. Kusuka ezikhulwini kuya emaqenjini okuyiwona esihlangene ngawo.
“Kusemqoka ukuqhakambisa ukuma nathi ngaso sonke isikhathi kukaPhumi Mkhize nethimba lakhe kwiSafa Ethekwini. Kwala noma sesixabana kodwa abakakaze basidube.
“Okusixhumanisa kakhulu neSafa abantu esisebenza ngabo okuyinto efanayo noKhozi FM. Noma lezi zinhlaka zingaxabana kodwa ziyohlale zixhumene ngenxa yabantu ezibaphakela abakufunayo ngokwahlukana kwazo.
“Lo mqhudelwano uzosisiza ukuvusa ubungani bethu neSafa noKhozi,” kusho uMbatha.
Amaqembu abesilisa asazomenyezelwa uma sekuphothulwe yonke imidlalo kodwa aqhathwe kanje esigabeni samaqoqo:
Group A: Home Boys, Napoli FC, Longcroft Falcons
Group B: Tongaat FC, Sylvester FC, Ethekwini Coastal
Group C: Young Movers, Cherrians FC, Newtown Ajax
Group D: Umbumbulu Academy, Hope United, Arena Spurs
Group E: TC France Academy, Sotobe Quality FC, Reunion FC
Group F: Durban Spurs, Menziwa Tigers, Clermont FC
Group G: Mayville Classic, Qadi Nyuswa FC, Hostel FC
Awesifazane asedlale aze afika kuma-quarter-final, lapho eqhathwe khona kanje:
Babambe v Ussasa Ladies
UMlazi Y Lions v Toti Ladies
MI Future Ladies v Molweni Ladies
Durban Ladies v MUT Ladies