IPirates idliwe yaphenduka isitebhisi seLeopards

SITHEMBISO MKHIZE

Black Leopards (2) 2

Orlando Pirates (0) 0

INHLAKANHLAKA yebhola elidlalwe yi-Orlando Pirates izolo iyivimbe ukuthi ivale igebe emaqenjini aphezulu kwiDStv Premiership.

IPirates ifane nesitebhisi kwiBlack Leopards, ikhala ngaphansi ngo 2-0 izolo ntambama eThohoyandou Stadium.

Amagoli iLidoda Duvha engcwabe ngawo eZimnyama kube umkhonto ogwaze ekhaya oshaywe u-Innocent Maela ngomzuzu ka-29 nelikaRoderick Kabwe ngoka-40.

ILeopards ebinganikwa lutho ngaphambi kwalo mdlalo ngenxa yokuba semaqenjini asemsileni, itshengise zisuka ukuthi ifuna igoli. Ukaputeni wayo, uRodney Ramagalela ubelokhu engqongqozile njalo.

Ukunqoba kwaleli qembu eliphekwa uDylan Kerr kulisusile emaqenjini emsileni lanyukela endaweni ka-14 kwi-log.

KwiPirates kugqame ukungahlangani kwabadlali bayo, benza amaphutha ezingane zesikole.

Isehlakalo esifakazele lokhu kube wukungqubuzana emoyeni kwezitobha zayo uNtsikelelo Nyauza noWayde Jooste, zibanga ibhola zodwa.

Bashayane kabi ngamakhanda okuholele ekutheni bangawuqedi umdlalo.

Endaweni kaNyauza kungene uHappy Jele ofike wathatha ibhande lobukaputeni ephuca uThulani Hlatshwayo. UJooste akabuyanga esiwombeni sesibili. Indawo yakhe ithathwe uTerrence Dzvukamanja .

Esinye esihlakalo esishayise ngamahloni ngesikaMaela obungafunga ukuthi ubekufuna ukushaya igoli ngakubo.

UDonald Makgetlwa weLeopards ugobe ibhola elingqofwe uMaela ngakubo, usindele isigxobo sepali kwaba ikhona.

UKabwe ushaye le khona, uMaela wawugwaza ekhaya umkhonto.

Ngaphambi kwalo mdlalo bekulindeleke ukuthi eZimnyama ebeziphuma ekubhaxabuleni iTshakhuma FC ngo-3-0, enkundleni efanayo, zizichanasele.

Bekulindeleke nokuthi zisebenzise ithuba lokulahla amaphuzu kweMamelodi Sundowns edlale ngokulingana neSuperSport United ngeledlule. IBucs ilahle ithuba lokunyukela endaweni yesine ngamaphuzu angu-20. Bekuzoyenza isale ngamahlanu kwiDowns ebambene ngamaphuzu awu-25 neSwallows esicongweni.

Okuqaphelekile ngabadlali beliDoda Duvha bebenethezekile uma bephethe ibhola kusukela emuva kuya phambili.

Kulabo abebebhokile bekuwuRamagalela, Makgetlwa, noKabwe. Nodonga lwayo obelukhonke ngo-Edwin Gymah, Khomotso Masia noTebogo Makobela, belungazibekile phansi.

Ngomzuzu ka-40, u-Ovidy Karuru udlale ingcwenga yebhola ephasela ngesithende uKabwe ongachithanga sikhathi walibeka enethini.

Esiwombeni sesibili iPirates izamile ukubuya kwasho ukuthi iLeopards ivalile emuva. UKerr ebona ukuthi kuyonakala, ufake uLifa Hlongwane noMumuni Abubakar abafike bakhonka esiswini.

Ukube, uMohammed Anas ongene esikhundleni sikaKaruru, akacucuzanga ngomzuzu ka-87 noka-91 esebhekene nonozinti weZimnyama, uWayne Sandilands, ngabe kukhulunywa ukuthi iLeopards inqobe ngo-4-0.

Uma iPirates ingase iqhubeke nebhola elidlale ikakhulukazi ngesiwombe sokuqala kubukeka izoba nenkinga uma seyidlala neLamontville Golden Arrows engagayelwa mphako kulezi zinsuku.

Lo mdlalo ungoLwesithathu e-Orlando Stadium ngo-5 ntambama. ILeopards kowayo olandelayo izokwamukela iCape Town City ngosuku nangesikhathi esifanayo.

Imiphuyela yeGladAfrica Championship yangempelasonto:

Steenburg United 2-0 Cape Town All Stars; Free State Stars 1-2 Sekhukhune; Jomo Cosmos 0-1 Royal AM; JDR 1-2 Cape Town Spurs; Richards Bay 0-0 TS Sporting; University of Pretoria 1-1 Uthongathi; Pretoria Callies 2-1 Polokwane City.

Imiphumela yeDStv Premiership yangempelasonto:

Cape Town City 1-2 Kaizer Chiefs; Baroka 0-1 Swallows; SuperSport United 0-0 Mamelodi Sundowns; Lamontville Golden Arrows 1-0 Tshakhuma; Bloemfontein Celtic 1-1 Stellenbosch; AmaZulu 0-0 Maritzburg United; Black Leopards 2-0 Orlando Pirates.