KUQHILIKA izihlathi kumqeqeshi weBafana Bafana, uStuart Baxter kulandela ukubuyela enkundleni kwesinye sezethenjwa zakhe ebese sihlale izinyanga ezine singalithinti ibhola ngenxa yokulimala uKeagan Dolly weMontpellier edlala esigabeni esikhulu eFrance.
UDolly oseqiwe imidlalo emqoka yeBafana wagcina ukubonakala enkundleni ngoSepthemba alimala ngawo. Lo mdlali osuke kwiMamelodi Sundowns waya eFrance, udlale imizuzu yokugcina ewu-15 ngesikhathi iMontpellier ikhala ngaphansi ngo 1-0 kwi-Etente SSG ngaphansi kwe-Last 32 yeCoupe de France.
UDolly obeyinsika kwiBafana ngaphambi kokuthi alimale ubuya nje, kunezinkinga zokulimala kwabadlali abamqoka kwiBafana kanti nomdlalo omqoka okuyiwona ozocacisa nge-Africa Cup of Nations (Afcon) ususeduze. Phakathi kwabadlali abamqoka uBaxter angeke akwazi ukubasebenzisa kulo mdlalo omqoka neLibya singabala uThemba Zwane noBongani Zungu naye odlala eFrance.
Sisekuzo ezabadlali bakuleli abaphesheya kwezilwandle, uRefiloe Jane noRhoda Mulaudzi beCanberra United yase-Australia baphinde bangaphumelela ukusiza leli qembu ukuthi linqamule umgqigqo walo wokweqiwa amawini ngesikhathi likhala ngaphansi ngo 1-0 kwiPerth Glory. Njengamanje iqembu lalezi zihlabani zeBanyana Banyana lisendaweni yesikhombisa kwi-log.
Kule mpelasonto kwiChampionship yase-England, uKamohelo Mokotjo weBrentford ubesebhentshini umdlalo wonke bedlulela emzuliswaneni olandelayo kwiFA Cup. Bebenqoba kwi-Oxford United edlala kuLeague One.
Uma sibuyela eFrance, uLebohang Phiri weGuingamp ungene sekusele imizuzu ewu-22 ukuthi umdlalo uphele bebhekene neStade Pontivy. Usizile-ke nokho lo mdlali weBafana benqoba ngo 4-3 kuyona belu iCoupe de France.
ULuther Singh uqale umdlalo okwesibili kule sizini eqenjini lakhe elisha iChaves ebambane ngo 0-0 neVitoria Setubal okuwumphumela oshiye ezikaSingh zisemsileni weligi ephezulu yasePortugal ngemuva kwemidlalo ewu-16.