IZINKINGA ze-Orlando Pirates zingaba yingozi kuMaZulu FC uma ezoya emdlalweni wakusasa elindele ukuthi azozinqobela kalula.
Lokhu kushiwo unozinti woSuthu uSiyabonga “Nqaba” Mbatha, okholwa wukuthi kufanele bazihluphe ngokunqoba umdlalo wabo neZimnyama kusasa ebusuku banganaki ukuthi leli qembu lisanda kushiywa ngumqeqeshi uMilutin “Micho” Sredojevic. Izintambo zibanjwe nguRulani Mokwena osizwa nguFadlu Davids.
Ngaphandle kokushiya kukaMicho, iBhakabhaka liphuma esibhaxwini sika- 3-0 lishaywa yiSuperSport United emdlalweni we-Absa Premiership ngeledlule. NakwiCAF Champions League eZimnyama ziqale ngebatha zishaywa yiGreen Eagles yaseZambia ngo 1-0 emzuliswaneni wokuqala. NgoMgqibelo ebusuku, iBucs iphume zibekwa kwiMTN 8 ikhishwa yiHighlands Park eyishaye ngo 1-0.
Kwenzeka lokhu nje, naMaZulu aziwahambeli kahle izinto njengoba eseshaywe kuyo yomibili imidlalo yeligi. Akhale ngaphansi kwiBidvest Wits ngo 3-0 aphinde ashaywa yiPolokwane City ngo 1-0.
Usuthu nePirates bazotholana kowePremiership eKing Zwelithini Stadium kusasa ngo-7.30 ebusuku.
“Kungaba yingozi enkulu ukunaka izinkinga zePirates, siyeke ukulungisa ezethu. Ukuthi bashayiwe base beshiywa ngumqeqeshi akwenzi mehluko ngoba akukona ukuthi kulandwa umqeqeshi omusha kodwa kuqhubeka umqeqeshi obekhona uRulani Mokwena noFadlu Davids ngakho lokho akusho lutho. Sizobe sidlalela ekhaya ngakho kufanele siqinisekise ukuthi iPirates ayiphumi eKing Zwelithini. Asiyiqalanga njengoba kade kulindelekile imidlalo yethu kodwa lona ngumdlalo wokuthi sivuke sizithathe,” usho kanje uMbatha.
Ebuzwa lo nozinti ukuthi isimo sinjani eqenjini kwazise abayiqalanga kahle isizini uthe: “Umqeqeshi wethu uyaqinisekisa ukuthi sisesimeni esihle ngokomqondo. Nathi singabadlali siyazi ukuthi siqashiwe kuMaZulu ngakho iqembu liyohlezi lilikhulu kunathi. Lokho kusho ukuthi kufanele sibambisane sifukule iqembu. Akukhona okokuqala ukuthi sizithole sikulesi simo sokunganqobi. Okuhle wukuthi sikwazile ukuphuma ngaphambili okusho ukuthi sizophinda sikwenze ngoba neligi isanda kuqala.”
Ngesizini edlule Usuthu lushaywe kabili kuphela eKing Zwelithini Stadium. Lushaywe yiKaizer Chiefs ngo 3-2, lwaphinda lwashaywa yiChippa United ngo 1-0.
I-Pirates ingelinye lamaqembu ahlulekile ukushaya AmaZulu eMlaza njengoba umdlalo wabo emzuliswaneni wokuqala waphela ngo 1-1 kodwa e-Orlando Stadium emzuliswaneni wesibili iBucs yanqoba ngo 4-1.