IBONGELWE nangumongameli wezwe, uCyril Ramaphosa iMamelodi Sundowns Ladies iqopha umlando iba yiqembu lokuqala ukunqoba iCaf Womens Champions League eCairo, e-Egypt ngoLwesihlanu ebusuku.
Ubuqala ngqa ukudlalwa kulo nyaka lo mqhudelwano kanti iSundowns, ecijwa nguJerry Tshabalala no-Agnes Nkosi, yehlule ngo 2-0 iHasaacas Ladies yaseGhana e30th June Stadium.
Le nkundla yiyo futhi neSundowns yabesilisa eqophe kuyo umlando inqoba iCaf Champions League ngo-2016.
Idlale ibhola eliphezulu iSundowns kulo mqhudelwano kwazise ayingenelwanga goli emidlalweni emine kanti kumasemifinal idlule ngamaphenathi.
Amagoli kaChuene Morifi nensephe yeBanyana Banyana, u-Andisiwe Mgcoyi yiwo anqobele iSundowns isicoco.
URamaphosa ushicilele kwiTwitter ngemuva komdlalo ukuthi:
“Sibongela abasifazane beMamelodi Sundowns ngokuhlabana kwiCaf Women’s Champions League. Nijabulise ikilabhu nezwe lenu. Siyanibongela futhi niyithokozele nemibhiyozo yenu.”
ISundowns ilandela iBarcelona ngokuba ngenye ikilabhu enqobe iChampions League ngeqembu labesilisa nelabesifazane.
ISundowns ingelinye lamaqembu ePremier Soccer League (PSL) anohlangothi lwabesifazane adlala kwiHollywoodbets Super League, eyinqobe idlalwa okokuqala nyakenye ingakaze yehlulwe nakowodwa umdlalo.
Elinye iqembu kulokhu yiBloemfontein Celtic nokho uhlangothi lwayo lwabesilisa obeludlala kwiPSL, isiludayisile.