IChiefs ishoda ngomqeqeshi: Rulani
UMSIZI womqeqeshi kwi-Orlando Pirates uRulani Mokwena ngesikhathi iqembu liziqeqesha izolo eRand Stadium ngaphambi komdlalo wabakhaya neKaizer Chiefs eFNB Stadium, ngoMgqibelo ngo-3.30 ntambama. Isithombe: Phando Jikelo/African News Agency/ANA UMSIZI womqeqeshi kwi-Orlando Pirates uRulani Mokwena ngesikhathi iqembu liziqeqesha izolo eRand Stadium ngaphambi komdlalo wabakhaya neKaizer Chiefs eFNB Stadium, ngoMgqibelo ngo-3.30 ntambama. Isithombe: Phando Jikelo/African News Agency/ANA
IPHINI lomqeqeshi kwi-Orlando Pirates, uRulani Mokwena, likholwa wukuthi abadlali abasezingeni eliphezulu abasayiniswe yiKaizer Chiefs bayakumboza ukwentula ulwazi kwebhentshi laMakhosi.
UMokwena ubekhona ebhentshini leZimnyama ngesikhathi zibhubhudla iChiefs ngo 3-1 emdlalweni wabakhaya ngesizini edlule. Lo mphumela ungeminye ethayisele inzondo yabalandeli kumqeqeshi uSteve Komphela ogcine ezisulele.
NgoMgqibelo iPirates izokwamukela iChiefs emdlalweni we-Absa Premiership eFNB Stadium, eNasrec, ngo-3.30 ntambama.
UMokwena uthe ekhempini yeChiefs kuyabonakala ukuthi abusekho ubuhlakani nobuholi bukaKomphela, obekuyinto egqamile ngesizini edlule.
“Ngokokuqeqesheka, ngaphandle kokuzwakala ngichemile noSteve ngenxa yokuxhumana enginakho naye, ngicabanga ukuthi iChiefs ilahlekelwe kakhulu ngokuhamba kukaSteve. Inhlobo yomholi ayiyona namaqhinga akhe akungatshazwa. Uma uqhathanisa iqembu esibhekane nalo ngesizini edlule naleli lamanje, ngokokuhleleka, ukubona ngokucacile ukushoda ngomqeqeshi ofana naye.
“Ngaphandle kokudla amandla omqeqeshi okhona kodwa ngicabanga ukuthi kuyabonakala indlela abebedlala ngayo kusekhona uSteve nendlela abadlala ngayo manje. Uma ucubungulisisa, uyabona kuthi kukhona osekulahlekile,” kusho uMokwena.
Kuzoba ngokokuqala umqeqeshi weChiefs uGiovanni Solinas ebhekana nePirates. UKomphela akazange ayihlule iPirates kumasizini amathathu awahlale eNaturena. Akubuzwa ukuthi uthando lwabalandeli ngoSolinas luzovivinyeka ngempelasonto.
“Uma ubuka abadlali ababasayinisile, babhukule kakhulu. Abadlali ababasayinisile, basivalile isikhala sokwentula ulwazi kwebhentshi, obeluyindathane ngesizini edlule. Angisho ukuthi abadlali abebekade bekhona ngesizini edlule abekho ezingeni njengabamanje. Kodwa kucacile. Senike namuzwa uSolinas ezisholo yena. Uletha uKhama Billiat kwiChiefs, uManyama (Lebo), kukhona noCastro (Leonardo). Babhukule kakhulu ukuthuthukisa iqembu ngabadlali abasezingeni eliphezulu. Hhayi ngokwengeza isibalo kodwa balethe abadlali abangabawinela imidlalo noma yinini,” kusho uMokwena.
UBilliat ubengekho ngesikhathi iChiefs ihlula iBlack Leopards koweLast 16 yeTelkom Knockout ngeSonto. UMokwena uthe nakuba babethanda ukusayinisa uBilliat kodwa bajika umqondo ngemizuzu yokugcina emuva kokubona ukuthi ngeke bayithole inzuzo ngalo mdlali. UMokwena ubeqeqesha uBilliat kwiMameodi Sundowns ngesizini edlule.
“UKhama uyazigqugquzela yena. Uma abadlali benza lokho kuncane ukuqeqeshwa abakudingayo. Ngisenobudlelwano obuhle noKhama. Sazama ukusayinisa uKhama. Saqoka ngomzuzu wokugcna ukumyeka. Sakhuluma kakhulu naye sobabili. Sasesisondele kakhulu ukumletha kwiPirates.
“Kodwa saqoka ukuvikela ubumbano lweqembu ngoba umehluko phakathi kwesasizolahlekelwa yikhona, ngibala ukulimala nezinye izinto nenzuzo, kugcine kungawenzi umqondo,” kusho uMokwena.
Meyelana nomdlalo neChiefs uthe: “Sekunesikhathi siyicubungula iChiefs. Ikhefu leFifa lisisizile ukwenza lokho. Kubalulekie ukuthi abadlali badlalele ukuwina umdlalo hhayi ukunaka ukuba kowabakhaya.”