I-ORLANDO Pirates iqede inkululeko yeBidvest Wits inciphisa igebe lamaphuzu esicongweni se-log ye-Absa Premiership.
IBucs icoshe amaphuzu amathathu ngesikhathi ihlula iChippa United emdlalweni weligi, e-Orlando Stadium, eSoweto, izolo ebusuku.
Amagoli ePirates avalelwe phakathi nguHappy Jele, umkhonto ogwaze ekhaya kaPetso Maphanga, iphenathi kaVincent Pule noKudakwashe Mahachi. AweChippa abekwe enethini nguTebogo Tlolane nomkhonto ogwaze ekhaya ka-Innocent Maela.
Ngokuwina lapha eZimnyama zinciphise igebe lamaphuzu lafinyelela kwamabili. Ngaphambi komdlalo iPirates ibikade isele ngayisihlanu kwiBidvest Wits esesicongweni nobekwenza akhululeke phakathi umqeqeshi uGavin Hunt ezakhe ezizobhekana neKaizer Chiefs eBidvest Stadium namuhla ebusuku.
Emdlalweni wayizolo, iPirates iqonde kwiChippa umdlalo uqala, izama ukuyixina. Akuthathanga sikhathi yalithola igoli ngesikhathi uJele engqofela phakathi ifree kick kaThembinkosi Lorch. Emuva kwaleli goli, iPirates iqhubekile nokufaka ingcindezi kodwa yehluleka ukuthola elinye igoli ngokushesha. Imizamo yeChippa yokushaya igoli lokulinganisa ibichilizwa kalula wudonga lwePirates obelwakhiwe nguJele no-Alfred Ndengane obeqala ukudlala kweZimnyama.
Nokho ngomzuzu ka-22, lolu donga lwenze iphutha emuva kwephasi kaMark Mayambela ebhokisini, uTlolane walivalela phakathi. IPirates iqhubekile nokuhlasela. Ngomzuzu ka-27 uMaphanga, obolekiswe eZimnyama kwiChilli Boys, ulishaye ekhaya ezama ukuyingqofela kunozinti uDaniel Akpei.
Emuva kwemizuzu embalwa, umqeqeshi uJoel Masutha uvele wamkhipha, wafaka uBoikanyo Komane.
IPirates ibilokhu ihlasela kodwa u-Akpei enqaba.
Esiwombeni sesibili, iChippa ibuye yahlasela izama ukuthola igoli lokulinganisa kodwa ihluleka ukufinyelela kunozinti wePirates uSiyabonga Mpontshane.
Ngomzuzu ka-55 iPirates ithole iphenathi ngesikhathi uKomane ebeka phansi uPule ebhokisini. UPule uvuke wayibeka phakathi. Ngomzuzu ka-66 uMaela ulishaye ekhaya emuva kwekhona kaKurt Lentjies.
Sekusele imizuzu eyisithupha kuphele umdlalo uMahachi ushayele iPirates igoli lesine emuva kwebhola eligotshwe ngu-Asavela Mbekile kwesokudla.