UZwane ukhathazwa ubuncane besikwati seZinyoni
UJAPHET Zwane owayeyibamba kwiMoroka Swallows eminyakeni edlule, ufisa ukuthi kuqiniswe isikwati seZinyoni Isithombe: BACKPAGEPIX
SITHEMBISO MKHIZE
UMAKADEBONA owazakhela igama kwiMoroka Swallows, uJaphet Zwane uthi izikhulu zaleli qembu kuyaziphoqa ukungena emakethe uma sekuvulwe iwindi uma zingafuni ukungena enkingeni.
Ngesikhathi kuqala isizini ka-2020/21, iSwallows imangaze abaningi ibalwa namaqembu aphezulu kwi-log yeDStv Premiership ekubeni beyiphuma esigabeni esingezansi, iGladAfrica Championship. Kuphele imidlalo ewu-16 ingawazi umpentshisi.
Kowesi-17 ishaywe okokuqala iTS Galaxy ngo-2-1.
Kwi-log ibukeka iphuma kancane kancane embangweni wesicoco.
Okubukeka kuyishaya wukudlala ngokulingana emidlalweni eminingi ekubeni izimbangi zayo ziqoqa amaphuzu ngokugcwele.
ISwallows eqeqeshwa, uBrandon Truter, ihamba phambili kwiDStv Premiership ngokudlala imidlalo eminingi ngokulingana. Iyishumi. Seyehle yaze yafika endaweni yesihlanu ngamaphuzu awu-31, emidlalweni ewu-18.
Sezikhona izinkulumo ezithi abadlali bayo sebekhathele, isishaywa nayisipiliyoni.
UZwane obenza into yamehlo ohlangothini lwesinxele kwiSwallows waze wabonwa iFC Rostov yaseRussia ngo-2003, uthe iqembu lakhe elidala lishaywa ukuba nesikwati esincane.
"Noma ngingeke ngikusho kuphelele ukuthi abadlali beSwallows sebekhathele, engikubonayo ukuthi banesikwati esincane. Uma bengekho abadlali abambalwa abanjengoNjabulo Ngcobo, Thabo Matlaba, Kahomelo Mahlatsi nabanye, kuyabonakala. Kuyaziphoqa izikhulu zeSwallows ukuthenga abadlali abane noma abahlanu abazophungula umthwalo. Nakuba kungcono ukudlala ngokulingana kodwa kuba kubi uma izimbangi zikwazi ukuqoqa amaphuzu aphelele. Uma inganakile iSwallows ingazithola isonga isizini ingaphandle kweTop 8," kusho uZwane.
Ukhala ngesikwati esincane nje uZwane, kunamahebezi athi Izinyoni zingase zishiywe izinsika zayo uNjabulo Ngcobo oyibamba kuthule umoya emuva, Sifiso Hlanti nesikhwishikhwishi Kgaogelo Sekgota okuvela ukuthi bangase bavumbuke kwiKaizer Chiefs ngesizini ezayo.
"Uma begcina ngokuhamba laba badlali, kuzoyiphazamisa kakhulu iSwallows. Izophoqeleka ukungena emakethe kakhulu kunakuqala, inkulu indima abayilima kwiSwallows. Kasethembe ukuthi ukuvela kwalezi zindaba ngeke kubaphazamise laba badlali emiqondweni.”
NgoMgqibelo ezikaTruter zizovakashela iChippa United, eNelson Mandela Bay Stadium koqala ngo-3.30 ntambama. Emlenzeni wokuqala la maqembu abambana ngo-1-1.