UWilliams akafuni bagxile emaphutheni oweDortmund
INGCWENGA yebhola elidlalwa yiMamelodi Sundowns kwiFifa Club World Cup ilokhu ilukhulise njalo uthando lwabalandeli ngokwahlukana kwamaqembu umhlaba wonke
Image: BACKPAGEPIX
AKASIBONI isidingo sokugxila emaphutheni abawenze ngabodwana, uRonwen Williams, weMamelodi Sundowns, kunalokho uzishaya isifuba ngokungagudluki kwisikompilo lokugcina ibhola kwaleli qembu laseChloorkop ngisho selilandela ngembudlu kwiBorussia Dortmund yaseGermany.
UWilliams ungomunye wabadlali beSundowns abenze amaphutha aholele ekutheni iDortmund inqobe ngo 4-3 emdlalweni ka-Group F weFifa Club World Cup ngempelasonto e-TQL Stadium, eCincinnati, Ohio, e-United States of America (USA).
ISundowns esizakhele ugazi e-USA ngenxa yengcwenga yebhola elidlalayo, isuke esicongweni sika-Group F ngenxa yamaphutha enziwe abadlali abamqoka okunguWilliams noTeboho Mokoena esiwombeni sokuqala.
Ngaphandle kwalawo maphutha, ezikaMiguel Cardoso yizona ebezingcono kunaleli qembu laseGermany elihlonishwa i-Europe yonke ngamagalelo alo kwi-Uefa Champions League.
Ngesikhathi uWilliams ekhuluma nabezindaba ngemuva komdlalo akagxilanga emaphutheni abo kodwa ubezishaya isifuba ngeqembu alivimbelayo.
“Siphoxekile ngenxa yomphumela kodwa asikho isidingo sokunaka amaphutha esiwenzile singabadlali ngoba le yindlela esidlala ngayo,” kusho uWilliams.
“Indlela yethu yokudlala inayo ingcuphe yamaphutha kodwa isikhathi esiningi siyaphumelela. Kusemqoka ukwamukela ukuthi izinga esilijwayele alifani neleDortmund kodwa lokhu akusho ukuthi kufanele sizinyeze.
“Sidlale kahle futhi ukube amathuba esiwatholile siwasebenzise ngendlela, ngabe kukhulunywa okunye. Ngizishaya isifuba ngokungagudluki kwethu endleleni esiyaziyo yokudlala ngisho sekubukeka sengathi siyabulawa ngenduku.
“Kufanele azishaye isifuba wonke umuntu oxhumene nebhola laseNingizimu Afrika ngesikwenzile ngoba kukhulu futhi kusho lukhulu ngebhola lezwe kanjalo nezwekazi."
Lo nozinti uthembise ukuthi uzokwenza konke okusemandleni ukuthi abadlali basheshe bawudlulise lo mphumela.
ISundowns izovala iqoqo neFluminense yaseBrazil ngoLwesithathu ngo-9 ebusuku eHard Rock Stadium, eMiami, Florida.
Iwini ka 4-2 yeFluminense kwi-Ulsan HD, yenza kube wumqansa ukudlulela esigabeni esilandelayo kweSundowns esiyehlele endaweni yesithathu eqoqweni.
“Simelwe ukusonga iqoqo ngendlela ehloniphekile, ngakho-ke ngeke ngivume ukuthi abadlali badikibaliswe wumphumela weDortmund ngoba isimele iFluminense.
“Indlela yeFluminense yokudlala ifana ncamashi neyethu, ngakho-ke nawo lo mdlalo ungelinye ithuba lokufunda nokuzibheka ukuthi sikuphi ngokwezinga uma uqhathanisa namaqembu omhlaba,” kusho uWilliams.
Amagoli eSundowns ashaywe nguLucas Ribeiro esiwombeni sokuqala, Iqraam Rayners noLebohang Mothiba kwesesibili.