UKUBE bekungenxa yokubheduka kweCorona emhlabeni okuphoqe ukuthi kumiswe imidlalo kuhlehliswe ne-Uefa Euro 2020, mhlawumbe ingwazi yasePortugal uCristiano Ronaldo, ngabe isikhuluma okunye ngerekhodi lamagoli amaningi emhlabeni emaqenjini esizwe.
NgoLwesithathu uRonaldo ushaye igoli lakhe lika-102 kwiPortugal behlula i-Andorra ngo 7-0 emdlalweni wobungani.
Namuhla uzobe ezingela elinye uma sebebhekene neFrance kowe-Uefa Nations League, eLisbon, ePortugal emdlalweni osebusuku ngo-9.45.
EzikaRonaldo bekufanele ngoJuni zingene emkhankasweni wokuvikela isicoco se-Europa ezisinqobe ngo-2016 eFrance.
Kulowo mqhudelwano uRonaldo (35), waqhulula amagoli amathathu esiza iPortugal.
Akungatshazwa ukuthi le nsephe ibizophinde iphume namanye amagoli kwi-Euro ka-2020 nabezoyisondeza erokhidini langu-109 eliphethwe yinkakha kwezebhola yase-Iran engaziwa, u-Ali Daei eseyathatha umhlalaphansi.
URonaldo uhamba phambili ngamagoli emaqenjini esizwe kubadlali abasayibambile.
Imbangi yakhe enkulu uLionel Messi wase-Argentina, abaqhathe naye abathandi bebhola, inangu-71 emidlalweni engu-140.
Nokho yona eminyakeni engu-33 yobudala, isenalo ithuba lokumfica uRonaldo osedlalele iPortugal amahlandla awu-168 .
Kumqoka nokho ukubalula ukuthi yize uRonaldo, edonse kanzima ngo-Okthoba engadlali ngenxa yokuxinwa yicorona kuzomele aqhwandisise athole igoli kwiFrance, engompetha bomhlaba.
IFrance iphinde ishaye ngezitobha zeqophelo kubadlali abanjengoRaphael Varane, Aymeric Laporte, Kurt Zouma, Clement Lenglet nabanye.
I-Euro isizoba ngonyaka ozayo ngoJuni 11 kuya kuJulayi 11 emadolobheni angu-12 emazweni ahlukene e-Europe.
Imidlalo yediski:
Namuhla:
UEFA Nations League: San Marino v Gibraltar, 3.50pm, EPL, SSM; Malta v Andorra, 3.50pm, FTB; Cyprus v Luxembourg, 6.50pm, FTB; Azerbaijan v Montenegro, 6.50pm, EPL, SSM; Portugal v France, 9.35pm, SSM, EPL; Sweden v Croatia, 9.35pm, LIG; Switzerland v Spain, 9.35pm, FTB; Germany v Ukraine, 9.35pm, PSL.
Kusasa:
UEFA Nations League: Slovakia v Scotland, 3.50pm, SSM, EPL; Turkey v Russia, 6.50pm, LIG; Wales v Ireland, 6.50pm, SSM, EPL; Netherlands v Bosnia and Herzegovina, 6.50pm, PSL; Austria v Northern Ireland, 9.35pm, LIG; Czech Republic v Israel, 9.35pm, ACT; Denmark v Iceland, 9.35pm, FTB; Moldova v Greece, 9.35pm, VR2; Belgium v England, 9.35pm, SSM, EPL; Romania v Norway, 9.35pm, VR3; Italy v Poland, 9.35pm, PSL.
Uhlu lwabahlohli-magoli abahamba phambili emlandweni:
Umdlali Izwe lakhe Amagoli Imidlalo
1- Ali Daei Iran 109 149
2- Cristiano Ronaldo Portugal 102 168
3- Mokhtar Dahari Malaysia 86 131
4- Ferenc Puskás Hungary 84 85
5- Godfrey Chitalu Zambia 79 111
6- Hussein Saeed Iraq 78 137
7- Pelé Brazil 77 92
8- Kunishige Kamamoto Japan 75 76
9- Bashar Abdullah Kuwait 75 134
10-Sunil Chhetri India 72 115
11- Majed Abdullah Saudi Arabia 72 117