UKAPUTENI weBidvest Wits, uThulani “Tyson” Hlatshwayo, uchayise i-Orlando Pirates esayina inkontileka entsha neZitshudeni emuva kokusabalala kwemibiko yokuthi uzoshiya ekupheleni kwesizini ka-2017/2018.
UHlatshwayo uvuselele inkontileka yakhe ngeminyaka emithathu kwiWits ayijoyine esuka kwi-Ajax Cape Town eminyakeni embalwa edlule. Izindaba zokuzibophezela kukaHlatshwayo ziqinisekiswe ngumqeqeshi uGavin Hunt esithangamini nabezindaba ngesikhathi echonywa uphaphe lwegwalagwala ngokuba wumqeqeshi ovelele i-Absa Premiership Coach of The Month kaFebhuwari emahhovisi ePremier Soccer League (PSL) izolo.
Umgadli weZitshudeni uLehlohonolo Majoro uwine umklomelo womdlali ovelele ngoFebhuwari kwathi umgadli weKaizer Chiefs uLeonardo Castro wadla umhlanganiso ngegoli lakhe lokuqala ePhefeni alishaye behlula iBaroka ngo 2-1 emdlalweni wePremiership eFNB Stadium.
Ngaphandle kukaHlatshwayo, iZitshudeni zivuselele inkontileka kanozinti uMoeneeb Josephs ngeminyaka emibili nekaBuhle Mkhwanazi oyibamba emuva. Kuvele nokuthi umgadli wase-Egypt, u-Amir Gamaal useshiyile kwiWits, wazitholela iqembu eFinland.
UHunt uthe izingxoxo ziyaqhubeka nabanye abadlali.
“UHlatshwayo usayine inkontileka entsha yeminyaka emithathu. Kade ngiyifunda nasemaphepheni indaba yakhe nePirates. Lokhu kumphazamisile ngoba kade efonelwa. UBuhle naye simnike inkontileka entsha, wayisayina. Kunezindawo obekufanele senze isiqiniseko sokuthi aziphazamiseki njengoba sifuna ukwakha kabusha iqembu,” kusho uHunt.
“Sizama ukwakha kabusha iqembu kodwa sibe sifuna nemiphumela. Sihlale silahlekelwa abadlali, linjalo ibhola. Kufanele sidayise siphinde sithenge. UGamaal usehambile, wazitholela iqembu elisha eFinland. Ngebhadi izinto azihambanga kahle. Ngiphoxekile ngoba kade ngizitshela ukuthi uzoshaya into ecokeme eqenjini kodwa akwenzekanga. Uhlulwe amagoli amaningi. Ngokomqondo ubelungile kodwa izinto azihlangananga.
“Bekunzima kuyena ikakhulukazi ukuxhumana ngolimi. Kuyenzeka lokho kubadlali uma beyodlala kwamanye amazwe. Yena ubeqala ukuyodlala ngaphandle kwezwe lakhe.”
UHunt uthwale kanzima esigamini sokuqala sesizini ngesikhathi iqembu lakhe lihlezi emsileni. Ngempelasonto iWits ikhishwe kwiCAF Champions League yiPremiero de Agusto yase-Angola. IZitshudeni zizokwehlela kwiCAF Confederation Cup lapho zizoqhathwa khona namaqembu ahlulwe kwiChampions League njengayo.
KwiConfederation kukhona iSuperSport United edlulele esigabeni samaqoqo. Amaqembu azoqhathwa kusasa eCairo, e-Egypt.
“Sizobona ukuthi sithola maphi amaqembu. Kodwa siyafuna ukuhamba ibanga elide kwiConfederation Cup. Sibhekane nenkinga yokushoda kwabadlali ngenxa yokulimala namakhadi. Akukhona ukuthi asizimisele ngeCAF. Kodwa kulo mqhudelwano udinga amava nokwazi ukuthi izinto zenziwa kanjani. ISundowns inakho lokho,” kusho uHunt.
UMDLALI weBidvest Wits uLehlohonolo Majoro enomqeqeshi wakhe uGavin Hunt ngesikhathi kuqokwa abashaye into ecokeme ngoFebhuwari emahhovisi ePSL izolo