UMGADLI omusha we-Orlando Pirates, u-Augustine Mulenga, ulandela iziyalo zezinkakha ezimdonse ngendlebe ukuthi angazitheli ngabandayo eNingizimu Afrika.
UMulenga waseZambia uchayise amaqembu abekade emfuna, wajoyina iPirates esidlalelwe ngabadlali abaningi bangakubo.Ushayele iPirates igoli lokuwina esuka ebhentshini ngesikhathi leli qembu lihlula iBloemfontein Celtic ngo 2-1 e-Orlando Stadium ngoLwesithathu ebusuku. Bekuyigoli lakhe lokuqala kusuka ejoyine iBucs ezinyangeni ezedlule esuka kwiZanaco yaseZambia eyaziwayo emidlalweni yeCaf Champions League. Injabulo yePirates ehleli endaweni yesibii kwi-log yengeziwe izolo iwola yonke imiklomelo kaMashi ye-Absa Premiership. Umqeqeshi uMilutin “Micho” Sredojevic uqokwe njenge-Coach of The Month kwathi uMusa Nyatama wagoduka nowePlayer of The Month. Igoli likaJustin Shonga alishaye behlula iChippa United emasontweni adlule, lidle umhlanganiso liqokwa njenge-Absa Premiership Goal of The Month.
UMulenga uthe ulandela iziyalo zikaKalusha Bwalya ohlonishwayo ebholeni laseZambia noWendson Nyirenda owayengumgadli weKaizer Chiefs oseqeqesha iChipolopolo. Bobabili bathe uMulenga uzoqhakaza eNingizimu Afrika.
“UKalusha noWendson bayakwazi engikwazi ukukwenza futhi bayangithemba. Ngilandela iziyalo zabo. Bangidonse ngendlebe ngokuthi ngizikhandle ejimini. Bathe sonke isikhathi uma umqeqeshi enginika ithuba ngilisebenzise, konke kuzongihambela kahle,” kusho uMulenga.
UMulenga ulandela ezinyathelweni zabadlali baseZambia abashaye into ecokeme kwiPremiership okukhona kubona umgadli uDennis Lota, Collins Mbesuma osaphethe irekhodi lamagoli amaningi ngesizini kwiPremiership, James Chamanga owadla umklomelo wamagoli edlala kwiMoroka Swallows, Chris Katongo wodumo kwiJomo Cosmos.
Mayelana negoli alishayile, uMulenga uthe: "Ngesikhathi umqeqeshi engifaka enkundleni, bengikwazi engizokwenza. Igoli engilishayile akulona elokuqala ngilishaya ngaleya ndlela. Ngijwayele. Ngesikhathi ngithola ithuba ngibone kufanele ngikhahlele ngoba yinto engiyenza njalo uma siziqeqesha. Ngingumdlali omusha lapha. Kufanele ngenze konke okusemandleni ukuze ngesizini ezayo ngizoqala ngokuzethemba. Ngiyazi ukuthi sekusele imidlalo embalwa, kufanele nginyuse izinga njalo uma ngithola ithuba. Ngifuna ukulandela ezinyathelweni zabadlali baseZambia abenze kahle kuleli qembu. Ngifuna ukwenza ngaphezu kwabo ngoba sekuyisikhathi sami manje.”
USredojevic, osewuwina okwesibili umklomelo womqeqeshi wenyanga, uthe konke lokhu kuwumphumela wokusebenzisana kwiPirates kusukela ethimbeni labaqeqeshi, abaphathi nabalandeli. Kodwa wathi akajabulanga ngendlela abadlale ngayo koweCeltic.
“Lokhu kukhombisa umsebenzi esiwenzayo eqenjini. Ngijabule futhi ngizizwa ngihloniphekile ngokuthola lo mkomelo. Kodwa kusekuningi okufanele sikulungise. Kufanele sisebenze kanzima ukuthola amaphuzu kule midlalo eyisihlanu esele,” kusho uSredojevic.
Imidlalo ye-Absa Premiership
Kusasa Ngo-3pm: Golden Arrows v Free State Stars (Princess Magogo); Kaizer Chiefs v Chippa United (FNB Stadium).
Ngo-8.15pm: Maritzburg United v Cape Town City (Harry Gwala); Platinum Stars v Polokwane City (Royal Bafokeng Stadium).
NgeSonto Ngo-3pm: Baroka FC v Mamelodi Sundowns (Peter Mokaba Stadium); Bloemfontein Celtic v AmaZulu (Dr Molemela Stadium).