SITHEMBISO MKHIZE
UFUNA kulungiswe inkinga yokugeja kwiLamontville Golden Arrows umqeqeshi waleli qembu uMandla Ncikazi.
UNcikazi ukusho lokhu ngemuva kokudedela amaphuzu agcwele bebanjelwa ekhaya yiBloemfontein Celtic emdlalweni weDStv Premiership ophele ngo-1-1 eSugar Ray Xulu Stadium, ngempelasonto edlule.
Ukungawini kwaBafana Bes’thende kubalahlekisele ngethuba lokubuyela endaweni yesibili kwi-log njengoba sebehleli kweyesithathu. Indawo yesibili ithathwe AmaZulu FC anqobe iStellenbosch bese kuqhwakela iMamelodi Sundowns.
UNcikazi obebonakala ephoxekile ngemuva komdlalo, uthe akajabhisiwe indlela abafana bakhe abadlale ngayo, uphoxwe ukuyeka kwabo inqwaba yamathuba.
"Siyeke inqwaba yamathuba, kumele ukube lo mdlalo siwunqobile. Sizolwa nayo le nto yokuba buthuntu phambi kwamapali. Kangisoli muntu, kumele sizigxeke sonke. Mayelana nokudlala, abadlali bami badlale kahle uma kuqhathaniswa nomdlalo odlule (weSwallows). Akusenani, leli phuzu lizokwengeza kokufunwa ukuzuzwa iqembu, lingcono iphuzu kunokwehlulwa," kubeka uNcikazi.
Ngomdlalo weSiwelele bekungowesithathu i-Arrows idlala ngokulingana kulandelana. Ibambane neCape Town City neSwallows.
Yagcina ukunqoba ekuqaleni kukaMashi ishaya iTshakhuma ngo-2-1.
Ngo-Ephreli 21, ezikaNcikazi zizovakashela iSuperSport United, eMasterpieces Moripe Stadium koqala u-5 ntambama.
Amatsatsantsa a Pitori aphuma esibhaxwini esivuthayo sika-3-0 asithole kumaCitizens ngeledlule.
Kwi-log yeDStv Premiership aya ngokwehla njengoba esesendaweni yesithupha ngamaphuzu awu-35, emidlalweni ewu-22. Ake abalwa namaqembu amathathu phezulu.
NoJohn Maduka ocija iCeltic ukhale ngamathuba ayekwe abafana bakhe.
"Lo mdlalo kumele ukube siwunqobe ngenqwaba yamagoli. Ukungasebenzisi amathuba kusiphuce amaphuzu amabili wonke. Siye kulo mdlalo sazi ukuthi i-Arrows idlala ibhola elifana nelethu. Besiyivumela ize kithina bese siyayizuma. Yingakho sithole amathuba amaningi. Sizoqhubeka nokusebenza kanzima kuze kube iyalunga indaba yokushaya amagoli," kusho uMaduka.
ICeltic izodlala neSwallows ngo-Ephreli 20 eSeisa Ramabodu Stadium ngo-5 ntambama.
EzikaMaduka zisendaweni yeshumi ngamaphuzu awu-24, emidlalweni ewu-22.