UNcikazi ukhetha isifiso sePirates kunemiphumela
UNOZINTI we-Orlando Pirates obeqala ukudlala esikimini esikhulu uSiyabonga Dladla
Image: BACKPAGEPIX
SuperSport United (0) 0
Orlando Pirates (0) 1
IBAMBA lomqeqeshi kwi-Orlando Pirates, uMandla Ncikazi, kalizimisele ngokuchezuka ezinhlelweni zeqembu zokujwayeza injejane ukudlala esikimini esikhulu ngisho ngabe lokhu kunobungozi bokuthi iqembu lidedele umgqigqo kwiBetway Premiership.
I-Pirates iwine okokuqala ngaphandle kukaJose Riveiro yehlula iSuperSport United emdlalweni weligi ePeter Mokaba Stadium, ePolokwane, izolo ebusuku.
Omunye walaba bafana abancane, uMohau Nkota, uyena oshayele iPirates igoli lokuwina ebeliyibeka emaphuzwini angu-59 njengoba isasalelwe imidlalo emibili.
Kuze kwayiwa ekhefini zithengana kodwa lingekho iqembu eliveza obala izinhloso zalo ngomdlalo.
UMDLALI osemncane we-Orlando Pirates, uSimphiwe Selepe, ngomunye wasebezitholele indawo esikimini esiyibamba kwiBetway Premiership Isithombe: BACKPAGEPIX
Image: BACKPAGEPIX
Bekusobala ukuthi abadlali bePirates bakhathele ngenxa yemiqhudelwano eminingi abayidlale kule sizini kodwa abeSuperSport abazange bakhombise izimpawu zokuthi balengela ezembeni.
I-Pirates ihamba yodwa kule sizini ngokukhiqiza injejane efika eqenjini elikhulu ifake isandla ngale ndlela yokuthi igcina iphenduka izinsika njengoba kwenze uRelebohile Mofokeng (20), Nkota (20) noMbekezeli Mbokazi (19) noSimphiwe Selepe (20).
Ngaphambi komdlalo wayizolo okubonakale kuwona uSiyabonga Dladla obevimbe okokuqala eqenjini elikhulu, uNcikazi uthe lokhu akwenzayo kuyindlela iqembu elihlele ukuqinisa kuyona.
Ngaphandle kukaDladla obekuwusuku lwakhe lokuzalwa ehlanganisa iminyaka engu-24 ubudala, lo mdlalo uqalwe nguMbokazi, Nkota noSelepe. Ebhentshini bekukhona ukaputeni wePirates kwiDStv Diski Challenge (DDC) uCemran Dansin, Boitumelo Radiopane (22) noYanga Madiba (23).
“Imiphumela imqoka kule midlalo esisalele kodwa asisiboni isidingo sokuchezuka kulokhu iqembu elizama ukukwenza,” kusho uNcikazi kwiSuperSport.
“Abafana abancane bayikusasa leqembu, ngakho-ke leli yithuba labo lokuziveza kubaqeqeshi. Yebo siyiqembu elikhulu kodwa siyabuqonda ubumqoka bokuzikhulisela okufakazelwa wukuthi kumanje sidle izithelo zalokho.
“Okubalulekile ukungagcini ngokubakhuphulela esikimini esikhulu kodwa uma sebefikile, kufanele ubathembe. Ukuqala umdlalo kukaDladla kuxhumene nalokho. Iqembu liyamethemba kanti naye uyazethemba."
Esiwombeni sesibili uNkota ubeke iPirates ebuhleni ngomzuzu ka-72 eqobela phakathi ibhola aliphakelwe nguKarim Kimvuidi obesanda kungena endaweni kaKabelo Dlamini.
Nakuba iSuperSport izamile yaze yashaya ipali ngomzamo kaNyiko Mobbie, umphumela ugcine uvune eZimnyama.