UMutizwa ugudluze uKhenyeza emlandweni we-Arrows
U-KNOX Mutizwa usehamba phambili ngokushaya amagoli emlandweni weLamontville Golden Arrows Isithombe: BACKPAGEPIX
UMGADLI weLamontville Golden Arrows, uKnox “The Hitman” Mutizwa ugudluze umqeqeshi waleli qembu esihlalweni sokubaqwaqwada bonke emakhanda ngokushaya amagoli emlandweni waBafana Bes’thende.
UMutizwa (27) ongowokudabuka eZimbabwe, uzifake emabhukwini omlando waBafana Bes’thende kwazise uyena osezihola phambili ngokuhlohlwa kwamagoli kuleli qembu elasungulwa eminyakeni ecela kwengu-80.
Lo mgadli ogqame kwiHighlanders yaseZimbabwe ngaphambi kokufika eNingizimu Afrika, ukwenze lokhu ngesikhathi eshaya igoli elisize i-Arrows yawina ngo-3-1 kwiMarumo Gallants kwiDStv Premiership ngempelasonto eThekwini.
Ngokushaya leli goli obekungelika-40 kwi-Arrows, uMutizwa udlule uKhenyeza obephethe leli rekhodi ngamagoli angu-39.
UKhenyeza ube ngomunye wabamjabulela kuqala uMutizwa kwazise ubesebhentshini le-Arrows njengoba esebenza njengephini lenhloko yabaqeqeshi uLehlohonolo Seema.
“Usephinde wahlabana ngokuqopha omunye umlando uMutizwa. Siyambongela uKnox “The Hitman” Mutizwa ngokuba umshayi wamagoli obehlula bonke emlandweni weLamontville Golden Arrows njengoba eyibhakuzise okuka-40 inethi sibhekene neGallants.
“Ngokwenza lokhu ubedlula uMabhuti Khenyeza obephethe leli rekhodi ngamagoli angu-39,” besibhalwe kanje isitatimende se-Arrows ekhasini layo likaTwitter.
Ubuqhawe bukaMutizwa bubeke i-Arrows endaweni yesihlanu kwi-log njengoba iligi izoma ngenxa yemidlalo yeFifa.
Emidlalweni eyisithupha yokuqala isizini entsha, i-Arrows iphumelele ukunqoba emibili, yadlala ngokulingana kwemithathu yase ishaywa kowodwa.
Kubhekwe lukhulu kwi-Arrows uma zibuya ekhefini ngoba iyona enomqansa wokubuyisela iMamelodi Sundowns kwamhlaba njengoba bezobhekana ngo-Okthoba 20, eSugar Ray Xulu Stadium, eClermont.
ISundowns izihola phambili kwi-log ngamaphuzu awu-16 njengoba lingekho iqembu elisakwazi ukuyehlula kwiligi emidlalweni eyisithupha.