UMGADLI omusha weLamontville Golden Arrows, uRyan Moon, ukholwa wukuthi bengakuqeda ukukhonya kwabangaphandle uma bengazikhandla ngokuphindiwe bengabadlali bakuleli.
UMoon umenyezelwe njengomdlali we-Arrows ngesonto eledlule. Ubekade eyibamba kwiVarbergs BolS FC yaseSweden, ashiye eyishayele amagoli ayisikhombisa emidlalweni engu-25.
Nakuba uMoon efike ebholeni laseMzansi eminyakeni edlule engomunye wabagadli abasebancane abathembisayo, kodwa akakaze afinyelele ezingeni abekade ebhekwe kulona. Useke wadlala kwiMaritzburg United, Kaizer Chiefs neStellenbosch.
Abagadli baseNingizimu Afrika banenselelo yokubuyisa isithunzi sabo kwazise sekubusa abangaphandle kwiDStv Premiership. Kusukela ngesizini ka-2018/2019, uyedwa kuphela umgadli waseMzansi owine umklomelo iLesley Manyathela Golden Boot Award. Ugcine ngoBrandly Grobler eshayela iSuperSport United angu-16, ngesizini ka-2020/2021.
Abangaphandle asebewudlile lo mklomelo nguMwape Musonda waseZambia, Peter Shalulile odabuka eNamibia noGabadihno Mhango waseMalawi.
"Lokhu kuyenzeka nakwamanye amazwe njengase-England naseSpain, ukuthi abagadli bangaphandle bakhonye. Njengoba kwenzeka nalapha eMzansi, akusho ukuthi asizami. Kodwa kudingeka sibhukule, sizikhandle ngokuphindiwe singabagadli. Ngihlala ngizitshele ukuthi uma ngingathola umqeqeshi okholelwa kimina nabadlali abazongakhela amathuba amaningi, ngingawashaya amagoli.
“Singabagadli baseNingizimu Afrika sidinga ukuqeqeshwa okuhle nezinhlaka ezisezingeni elifanele. Kufanele sisebenze kanzima, sakhe ubudlelwano nabadlali esidlala nabo. Kumele sikulambele ukushaya amagoli," kusho uMoon.
UMoon kulindeleke ukuthi kwi-Arrows, avale isikhala sikaKnox Mutizwa okuvela ukuthi uyalishiya iqembu. Omunye umdlali okuthiwa uyayishiya i-Arrows nguPule Mmodi okhonjwa kwiKaizer Chiefs.
"Ngiqoke ukujoyina i-Arrows ngenxa yebhola elidlalayo nabadlali enabo. Ngibonile ukuthi ngizothola amathuba amaningi okushaya amagoli. Ngaphandle kokuzifakela ingcindezi kanye neqembu, uma amathuba evela, kuwumsebenzi wami ukuwaqobela phakathi," kusho uMoon. Uthe izinto azihambanga ngendlela abefisa ngayo phesheya kodwa usenaso isifiso sokubuyela khona.