UMQEQESHI weMamelodi Sundowns, uRhulani Mokwena, ubhodla umlilo ngabadlali baleli qembu ababuye ekhempini yeBafana Bafana belimele.
ISundowns ibanjwe ngo 2-2 ngamavukana kwiCaf Champions League, i-AS Maniema Union yaseDemocratic Republic of Congo emdlalweni womzuliswano wesibili wokuhlungela amaqoqo ekuhambeni ngempelasonto. Amagoli eSundowns kulo mdlalo ashaywe uThemba Zwane.
AmaBrazilians ahlulekile ukubuya newini phezu kokuhamba phambili kabili kulo mdlalo. Umdlalo womlenze wesibili uzoba seLofus Versfeld Stadium, ngeSonto.
UMokwena ukhale ngezinto ezahlukene eziholele ekutheni behluleke ukuwina okukhona kuzona inkundla embi, ukungakwazi ukugcina ibhola, nabadlali abalimele. Ugcine ngokugxila kwabalimale kwiBafana.
"Yisimo esinzima. Asikwazi ngisho nokuxhumana nethimba lodokotela, asilwazi nohlelo lokuhamba lweBafana, asilwazi nohlelo lokuziqeqesha lweBafana, asitshelwa nokuthi kuhambe kanjani ejimini mayelana nokuthi kujinywe kangakanani. Alukho ulwazi esilutholayo. Ngakho ukubambisana kwethu neBafana kuyacasula kancane ngoba siyiSundowns sihlala siyiqembu lokuqala elikhombisa intshisekelo yokweseka isizwe ngokudedela abantu ngobuningi okubalwa kubona nabangebona abadlali, "kusho uMokwena.
"ISundowns ihlala iyibeka phambili iBafana, kwesinye isikhathi ngaphambi kwayo uqobo. Kuyajabhisa ukuthi ngisho ekhempini eyandulela esiphuma kuyona uThapelo (Morena) ubuye elimele. Sisazana ukumbuyisela esimeni. Simnike imizuzu embalwa namuhla (ngeSonto). Useqatha yena, useyadlala futhi useyaziqeqesha kodwa akakalungi kahle."
UMokwena uqhubekile wabala abanye abadlali ababuye ekhempini yeBafana bengakulungele ukudlala okukhona noMuthobi Mvala. Uthe UMvala ubezoba wusizo kakhulu kulo mdlalo weCaf ngenxa yokukwazi ukulwela amabhola aphezulu. Kusale ukuthi alimise ngesihloko elokuthi kwiBafana bajinyiswa ngokweqile abadlali.
"URushine De Reuck emdlalweni odlule neSwallows, simkhiphile ngoba sibona ingozi. Ubezwa ubuhlungu emsipheni kodwa waqhubeka wadlala kwiBafana. U (Thabiso) Kutumela ubuye ekhathele, wehluleka ukudlala. Lena ngenye yezinto ezisiphoxayo kodwa kulungile. Sizoqhubeka nokweseka iqembu lesizwe Sijabhiswa nje wukuthi kuyayiywa eqenjini lesizwe kodwa asitholi mpendulo. Hhayi kuphela ethimbeni labaqeqeshi kodwa nakodokotela,"kusho uMokwena.
"Ngiyaphinda futhi, siyiSundowns siyohlala sibheke ukweseka iqembu lesizwe. Wukuthi nje kuyajabhisa ukuthi emakhefini amabili ebhola lomhlaba abadlali bethu babuye belimele futhi bonke yimisipha, okukhomba isimo semidlalo eminingi noma kujinywa ngokweqile. Kufanele senze kangcono kulezi zinto, sibone ukuthi singabuphucula kanjani ubudlelwano nokusebenzisana phakathi kwamaqembu. Ngibonile ukuthi noVincent Pule (olimale kwiBafana) akadlali. Ngakho kukhona okwenzekayo laphaya. Anginaso isiqiniseko sokuthi kuyini."
UMokwena ukhuluma kanjena, emasontweni amabili edlule kuqala ikhempu yeBafana ngaphambi kwemidlalo ne-Ethiopia, umqeqeshi weBafana, uHugo Broos, usole iSundowns ngokuphazamisa ikhempu yakhe ithatha uKutumela iyomgomela iCovid-19.
Wathi uyabona ukuthi akukho ukusebenzisana okukhona namqembu ngakho uzohlela umhlangano nawo, babonisane.
NgoLwesithathu ngo-3.30 ntambama, iSundowns izovakashela iLamontville Golden Arrows emdlalweni weligi eSugar Xulu Stadium, eClermont.