Umhlaba ‘udabukela’ iChelsea kwiPSG koweFifa
UMQEQESHI weChelsea u-Enzo Maresca odatshukelwa abalandeli bebhola umhlaba wonke kwazise babona ezokwengeza esibalweni sabahlangane nezimbila zithutha kwiPSG muva nje
Image: BACKPAGEPIX
CISHE umhlaba wonke kwabalandela unobhutshuzwayo, kunomuzwa wokwesabela iChelsea FC yase-England kowamanqamu weFifa Club World Cup kwiParis Saint-Germain yaseFrance, kulandela ukubhubhudla kwayo kwasani olubekwe phambi kwayo kulo mqhudelwano osongwa ngeSonto.
Le ngqophamlando yomqhudelwano obekuqala ukuthi isicoco sawo sibangwe amaqembu awu-32, uzosongwa ngendumezulu yomdlalo wamanqamu phakathi kweChelsea nePSG ngeSonto ngo-9 ebusuku, eMetLife Stadium, eNew Jersey, e-United States of America (USA).
I-PSG yaqala ukubhubhisa ngesikhathi idla isicoco se-UEFA Champions League yehlula i-Inter Milan yase-Italy ngo 5-0. Emuva kwalokho kwiClub World Cup, idlule kwi-Atletico Madrid yaseSpain ngo 4-0, Bayern Munich yaseGermany ngo 2-0 njengoba ibhabhadise iMadrid ngo 4-0 kowandulela owamanqamu.
Kungenxa yaleli rekhodi ‘umndeni’ kanobhutshuzwayo emhlabeni ukhuluma izwi lozwelo kwiChelsea ekhombisa izimpawu zokuthi isahlanganisa.
Leli qembu lika-Enzo Maresca lifike kowamanqamu linganikwe lutho uma uqhathanisa naleli elikaLuis Enrique okungathi lithelwe ngezibonkolo.
Kusemqoka nokho ukukhumbula ukuthi ezicocweni zeChampions League ezisekhabetheni leChelsea nakhona yayinganikwe lutho ngendlela efanayo kwiBayern eyayizowudlalela ekhaya owamanqamu ngo-2012, neManchester City kaPep Guardiola eyayingashayeki ngo-2021.