SITHEMBISO MKHIZE
UNOZINTI waMaZulu FC, uVeli Mothwa, ufanelwe wukubalwa nabazobanga umklomelo wovelele kule sizini yeDStv Premiership.
Lokhu kushiwo ngumqeqeshi wezakhe, uBenni McCarthy, ngemuva kokuthi yena nalo mdlali wakhe bethole imiklomelo yePremier Soccer League (PSL) ngokushaya into ecokeme ngenyanga kaMashi no-Ephreli.
UMcCarthy udle umklomelo womqeqeshi ovelele, kwathi uMothwa wathatha owomdlali obashaye bonke kulezi zinyanga. UMothwa, akangenelwanga goli emidlalweni eyisithupha.
Owegoli elivelele unikwe umgadli weKaizer Chiefs, uSamir Nurkovic ngegoli alishaya behlula i-Orlando Pirates ngo-1-0 kowomkhaya.
Kakukapheli sikhathi esingakanani lo mqeqeshi eklonyeliswe ngendondo efanayo phakathi kukaJanuwari noFebhuwari.
Ngaleso sikhathi wahlonishwa nomdlali wakhe, uTapelo Xoki ngegoli elivelele.
UMcCarthy uthe ukube kakujajwa ngokuthi yiliphi iqembu elinqobe inkomishi yeligi, uMothwa, amthathe kwiChippa United, ubezokhala amuke nowokuba ngunozinto wesizini.
"Ngiyazi ukuthi uDenis Onyango (weMamelodi Sundowns) usemathubeni ukudla umhlanganiso. Engikwaziyo wukuthi ukube uVeli udlala kwiSundowns njengoDennis, ongungwe ngabadlali bezinga eliphezulu, wubezokwenza okungaphezulu.
“Uma uqhathanisa uSuthu neKaizer Chiefs neSundowns abanenkece nenqwaba yabadlali bezinga eliphezulu, lwenza kahle kakhulu ngalaba badlali olunabo. Ngokwami uMothwa ukubadlali abathathu abafanelwe wumklomelo kanoznti ovelele. Noma angangawunqoba, ngiyazi uzoqhubeka nokusebenza kanzima,” kusho uMcCarthy.
Mayelana nomdlali wesizini, uMcCarthy, uthe: "Eqenjini lami nginabo abafanele wukufakwa ohlwini lwabangase banqobe lo mklomelo. (UMakhehleni) Makhaula obe nesizini enhle no(Augustine) Mulenga ohlale enomuzwa wokunqoba, owenza izimanga. Nakuba kunjalo, uShalulile (Peter) kumele abe phezulu kulolu luhlu. Ikushiya umangele indlela adlala futhi aqobela ngayo enethini amagoli.“
USuthu luwuqale kahle uMashi lucoboshisa iSuperSport United. Lulandele ngokunqoba imidlalo eyisithupha ngaphambi kokuthi lubambane nompetha beligi, iSundowns, okuyiwona wodwa umdlalo oluhlulekile ukubhakuzisa inethi kuwo. Kulesi sibalo, lushaye amagoli awu-13, lwangenelwa ngamabili kuphela. Ngokunqoba lo mklomelo kulandelana, uMcCarthy ulandela uBrandon Truter weSwallows, owuphakamise phakathi kuka-Okthoba noNovemba nangoDisemba noJanuwari.
NgoLwesibili Usuthu luhlulwe yiBaroka ngo 1-0 emdlalweni weligi obuseKing Zwelithini Stadium.
“Le nkundla ibiyikhaya leqembu kodwa kule sizini sidlale yonke imidlalo eKings Park Stadium futhi sayijwayela. Sesijwayele konke ngayo. Sithole imiphumela ethokozisayo khona. Manje umdlalo wakho wasekhaya uthuthelwe kwenye inkundla, kunika iqembu odlala nalo ithuba lokuwina," kusho uMcCarthy.