EMASONTWENI ambalwa azayo isitobha saMaZulu FC, uTsepo Masilela sizothatha isinqumo ngekusasa laso kunobhutshuzwayo. Kunabathi kumele ngabe usawagaxa kudala amakhokho emgibeni.
Selokhu uMasilela (37) ejoyine uSuthu ngesizini ka-2019/20, akakalitholi ithuba elanele lokudlala.
Kwafike ngayo udlale imidlalo ewu-11, kwisizini yesibili wagijima eyishumi nowodwa weNedbank Cup.
Kwephezulu, izinto zibheda kakhulu kunakuqala.
Usanikwe ithuba kwemihlanu kuphela yeligi nemibili yeCaf Champions League.
Ugcine ukuboshelwa maphakathi noMashi, iqembu lakhe libambana neMaritzburg United ngo-1-1 kwiDStv Premiership.
Ngokwemibiko, kuthiwa izikhulu zoSuthu ngeke ziyivuselele inkontileka yakhe ephela ekusongweni kukaJuni.
Leli nxele like laba ngesinye sezitobha ebezihamba phambili kuleli.
Phakathi kuka-2012 kuya ku-2017, uMasilela ubengaconsi phansi kubalandeli beKaizer Chiefs.
Ngo-2018 iChiefs iqome ukungayivuseleli inkontileka yakhe.
USuthu lumcoshe ejika nelanga.
Kunabakholelwa ekutheni kumele ukube usawagaxile emgibeni amakhokho ngenxa yokushiywa yiminyaka nokuphikwa yisikimu.
Mayelana nabosho lokho, uMasilela uthe: "Okwenzeka kimi kuyinto ejwayelekile nakwabanye abangangami. Uma umdlali eke wahlanganisa iminyaka ewu-30 abanye abantu babona ukuthi kumele aliyeke ibhola. Iningi lethu liyawuhlonipha futhi liyawuthanda umsebenzi. Liyakwazi ukumelana nalaba abasho lokhu."
Lo mdlali odabuka eWitbank, eMpumalanga, uqhube wathi kuzocaca kahle uma sekuphele isizini.
"Ekupheleni kwesizini ngizohlala phansi nomndeni wami sibone ukuthi siphuma nasiphi isinqumo. Ngizophinde ngihlale phansi neqembu lami ngizwe ukuthi lisangidinga noma cha. Ake ngithi nje, kuzoncika ezintweni eziningi. Inhloso yami wukuthi ngiqede le sizini bese ngithatha isinqumo,“ kusho uMasilela.
UMasilela wavela ebholeni elikhokhelayo ngeHellenic yaseCape Town.
Ngenxa yokuyibambe kuthule umoya ohlangothini lwesobunxele, uMasilela ugcine esesayiniswa iMaccabi Haifa.
Leli qembu elidlala kwi-Israel Premier League, libe selimbolekisa kwiGatafe eyibamba kwiLa Liga, eSpain.
UMasilela ubekhona nakwiBafana Bafana ebidlala kwiFifa Confederation Cup ngo-2009 nakwiNdebe yiMhlaba ngo-2010.
Nakwi-Africa Cup of Nations (Afcon) udlalile.
Seyiyonke imidlalo edlalwe wuuMasilela eqenjini lesizwe ibe wu-49.
Kusasa, ezikaMasilela zizovakashela iCape Town City, eCape Town Stadium.
USuthu lusendaweni yesikhombisa, ngamaphuzu awu-40, emidlalweni ewu-28.