ISIKHWISHIKHWISHI somgadli wasesiswini weMamelodi Sundowns, uLebohang Maboe sichaza uyise, uSidwell Maboe njengomqeqeshi wakhe wesine olime indima enkulu empumelelweni yaso.
Le nsizwa yaseHeidelberg, eGauteng, isonge isizini ka-2021/22 iqembu layo linqobe isicoco seMTN8, eseligi neseNedbank Cup.
Selokhu uMaboe efike kumaBrazilians ngesizini ka-2018/19, ephuma kwiMaritzburg United, usenqobe izicoco eziyisishiyagalombili.
Ukuba ngomunye wabadlali abayibamba kuthule umoya esiswini akwethusi njengoba ezalwa nguSidwell owayengalibheki ipali eminyakeni edlule.
Uyise kaMaboe wazakhela udumo kwi-Orlando Pirates. Amanye amaqembu adlala kuwo yiBloemfontein Celtic, AmaZulu, Wits University, Free State stars nakwiSuperSport United.
ULebohang obekhuluma nabezindaba kade iSundowns inomgubho wezindebe, akawuvalanga umlomo ngokusekwa nguyise ambiza ngomqeqeshi wezinga eliphezulu.
"Njalo emuva komdlalo siyaxhumana sihlaziye indlela engidlale ngayo. Lo mqeqeshi osekhaya nguyena ohlale engitshela iqiniso ngendlela engenze ngayo ngemuva komdlalo. Akangifihleli nakancane uma ngishaye udaka noma ngenze kahle. Emdlalweni olandelayo ngenza isiqiniseko sokwenza angiluleke ngakho," kubeka uMaboe omncane.
Uveze ukuthi uyise akazange amphoqe nakancane ukuthi ajoyine iPirates.
"Ubaba wangitshele ukuthi ngilandele inhliziyo yami, ngiye eqenjini engibona ukuthi ngizonethezeka kulo. Angizange ngiyizwe ingcindezi yokungayi kwiPirates.“
"Ngiwumuntu ohlukile. Ubaba uyilimile indima yakhe, wazuza okuningi. Kodwa-ke nami kumele ngigxile kimina. Nginengifuna ukukuzuza, mhlawumbe okwehlukile kunokwakhe. Engikwaziyo wukuthi ubaba uyaziqhenya ngami.“
ULebohang ube nebhadi ngasekuqaleni kwesizini elimala idolo. Lokhu kuholele ekutheni agcine egijime imidlalo yeligi emihlanu yokugcina. Udlale nemine yeCaf Champions League neyisibalo esifanayo yeNedbank Cup.
"Ngeke ngiqambe amanga, kube yisizini enzima ebixube imizwa ehlukene. Kungihlukumeze kakhulu emqondweni ukulimala idolo. Ukulimala kwami bekunzima, ngase ngisaba ngekusasa lami ebholeni. Kunesikhathi lapho ebengingakwazi nokululula unyawo. Kodwa ngazitshela ukuthi ukuze ngiphole, ngibuyele nasenkundleni kumele ngikwamukele okungehlele, ngingaxhamazeli, ngilandelele imiyalelo yodokotela.
"Ngokweqembu, senze kahle kakhulu. Lezi zingane ezintathu (esho izinkomishi) zisho ukuthi sibe nesizini enhle. Sinezifiso esihlale sifuna ukuzizuza. Ngikholelwa ekutheni ngesizini ezayo sisengenza kangcono kunalokhu. Kube buhlungu nokho ukuphunyukwa yiChampions League, " kusho uMaboe.