OMUNYE wabadlali be-Orlando Pirates abagqamile endleleni yayo ebheke kowamanqamu eCaf Confederation, uBandile Shandu, udalula isizathu esenza aqhulule amagoli kulo mqhudelwano kodwa adonse kanzima kwiDStv Premiership.
IPirates izodlala kowamanqamu neRSB Berkane yaseMorocco, ngoLwesihlanu, ngo-9 ebusuku, eGodwill Akpabio Stadium, eNigeria.
Nakuba uShandu edlala emuva nasesiswini kodwa ungomunye wabalele isibili kwabashaye amagoli amaningi kulo mqhudelwano.
Useshaye amane. Eqhulwini kunoVictorien Adebayor waseNiger odlala kwi-USGN yaseTunisia, unayisithupha.
Omunye oshaye amane uKarimu Konate ozobe ebhekene naye uShandu ngoLwesihlanu.
Emidlalweni yeligi, uShandu usashaye amabili emidlalweni ewu-26. Unamabili nakwiNedbank Cup.
Ukuba nesizini enhle yokuqala kwiPirates sekwenze wabizelwa naseqenjini lesizwe lesikhashana elizobhekana neMorocco neZimbabwe ngenyanga ozayo kweyokuhlungela i-Africa Cup of Nations (Afcon) yango-2023.
Ebuzwa ngemfihlo yokushaya amagoli kwiConfederation kodwa adonse akanzima kwiligi, uShandu uthe: "Kuhlukile ukudlala kwiligi kunokudlala ngaphandle. Kuleli kunzima, siyazana ngoba sidlala masonto onke. Emidlalweni yeConfederation Cup ngolunye udaba, angaziwa.
“Amanye amaqembu ayahluleka ukuhlaziya indlela esidlala ngayo njengoba enza awakuleli. Ngisizwe nawukuthi emdlalweni ngamunye besilinyusa izinga, sifunda nasemaphutheni ethu.“
Uqhube wathi usijabulele isipiliyoni asithole kwiConfederation Cup.
"Ngithanda ukubonga ozakwethu nabaqeqeshi ngokungisiza ekungeneni khaxa esitayeleni sePirates ngokushesha. Bangemukele kahle. Ukudlala kahle kwami kwiConfederation Cup iyona ndlela enginikela ngayo kubona.“
Mayelana nomdlalo wamanqamu neRSB Berkane, uShandu uthe ukuba sezingeni eliphezulu kwezitha zabo kubaphoqa ukwenyusa amasokisi kakhulu kunakuqala.
I-The Oranges Boys ingompetha beConfederation Cup yango-2019/20. Yashaya iPyramid yase-Egypt ngo-1-0. Ngo-2018/19 yehlulwa yiZamalek yakhona e-Egypt kowamanqamu. IPirates ayikaze iwunqobe lo mqhudelwano. Ngo-2015 yashaywa kowamanqamu yi-Etoile du Sahel yaseTunisia ngo-2-1.
"Kumele silenyuse izinga esilitshengise emidlalweni emibili eyedlule. Ukuze sinqobe kuzomele senze okungaphezulu siphinde sigxilise nemiqondo yethu ngokuphelele kulo mdlalo. Uma sizozikhandla ngokuphelele sizobuya nayo inkomishi," kubeka uShandu othathwe ngeZimnyama kwiMaritzburg United.
Mayelana nokubizelwa kwiBafana, uShandu uthe ubengazi ukuthi uqokelwe eqenjini lesizwe lesikhashana. Uthe uzizwa ebusisekile maqede wabonga iqembu lakhe ngokumnika ithuba lokuziveza.
Abanye bePirates ababizelwe kwelesizwe nguThembinkosi Lorch, Innocent Maela, Goodman Mosele, Fortune Makaringe noThabang Monare.