I-ORLANDO Pirartes isidlulele esigabeni sokugcina sokuhlungela amaqoqo kwiCaf Confederation Cup ingazange ilithinte ibhola ngemuva kokuhoxa emqhudelwaneni kweGD Segrada Esparanca yase-Angola.
Izindaba zokuthi awusekho umdlalo womlenze wesibili obekumele ube ngoLwesithathu kuleli, phakathi kwala maqembu ziqinisekiswe yiPirates ekhiphe isitatimende ngoMsombuluko.
EZimnyama bezihamba phambili ngo 1-0 ngemuva kokunqoba umlenze wokuqala emasontweni adlule.
Isitatimende sePirates siveze ukuthi yaziswe yiCaf ukuthi i-Esparanca isinqume ukuhoxa kulo mqhudelwano.
“Mayelana nokuhlelwa komdlalo uM.58 we-Orlando Pirates neGD Segrada Esperanca womzuliswano wesibili wokuhlunga weTotal Caf Confederation ka-2020/21, siyanazisa ukuthi iqembu iGD Segrada Esperanca isihoxile emqhudelwaneni. Ngakho siyanazisa ukuthi i-Orlando Pirates isidlulele emzuliswaneni olandelayo,” iPirates ibhale kanje icaphuna umyalezo ewutholile uvela kwiCaf.
IPirates isizobalwa namaqembu awu-16 asele kwiConfederation Cup, emzuliswano olandelayo azoqhathwa namanye awu-16 azobe ehluliwe kwiCaf Champions League. Azobe eseqhathwa ngoJanuwari 17. Amaqembu ayisishiyagalombili azobe esengena esigabeni samaqoqo.