Uhamba nesiteki sikaR50 000 oweSolezwe Soccer Cup

KUNXENXWA abafundi beSolezwe ukuba baphume ngobuningi babo ukuzothamela ukusongwa kweSolezwe Soccer Cup okuwumqhudelwano webhola labesilisa nabesifazane oyingxenye yemigubho yaleli phephandaba yokuqeda iminyaka engu-20 lasungulwa.

Lo mqhudelwano ohamba nesiteki sikaR50 000 esizohlukaniswa ngabadle umhlanganiso kwabesilisa nakwabesifazane, uzoqala ngeyokuhlunga ngoDisemba 12 ezinkundleni ezahlukene eThekwini, bese usongwa ngeyamanqamu ngoDisemba 18, ezodlalelwa eSugar Ray Xulu Stadium, eClermont.

Isolezwe Soccer Tournament yethulwe ngokusemthethweni izolo ekuseni, emahhovisi eSolezwe, eGreyville, eThekwini.

Ukwethulwa kwawo (umqhudelwano) bekuhambisana nokuqhathwa kwamaqembu angu-21 abesilisa (abavulelekile ngokweminyaka), namane abesifazane adlala kuma-Local Football Association (LFA), angaphansi kweSouth African Football Association (Safa), eThekwini.

NgoDisemba 18, okuwusuku lweyamanqamu kwabesilisa nakwabesifazane, kungenwa mahhala enkundleni kanti amasango azovulwa ngo-10 ekuseni.

Zizobe ziqinile ezokuphepha kanti utshwala abungeni enkundleni kanjalo nezikhali.

Iqembu elizodla umhlanganiso kwabesilisa lizogoduka noR20 000 owukheshi bese kuthi elizolala isibili lihambe noR15 000.

Kwabesifazane abazowina bazoya kuKhisimusi noR10 000 bese kuthi ozoshaywa kowamanqamu agoduke noR5 000.

Ngaphandle kokujabulisa abafundi bephephandaba, uKiki Ntuli, ongumhleli omkhulu weSolezwe, uchazwa yithuba lokufaka isandla ekuthuthukisweni kukanobhutshuzwayo kwazise uyimpilo yabo (abafundi).

“Okukhulu kunakho konke kithina ngalo mqhudelwano ukuthi uyingxenye yemigubho yethu eyahlukahlukene yokuqeda iminyaka engu-20 iphephandaba lasungulwa,” kusho uNtuli.

“Okunye okuyisifiso sethu esikhulu ukuthi njengoba lo mqhudelwano kungowokuqala, siwubone uqhubeka uze ugubhe owayo iminyaka engu-20.

“Konke kuqala kukuncane ngakho-ke nathi siyakholelwa ekuthi Isolezwe Soccer Tournament izolokhu ikhule njalo ngokuhamba kweminyaka,” kuqhuba yena.

“Kusemqoka kithina ukufaka isandla kumbe ukubamba iqhaza ekuthuthukisweni kwezemidlalo ikakhulukazi ibhola esifundazweni iKwaZulu-Natal.

“Inhloso yethu ukuthi lo mqhudelwano ungagcini esifundeni saseThekwini kuphela kepha usabalale isifundazwe sonke.

“Lo umqhudelwano oqondene ngqo nabafundi bethu ngakho-ke sinethemba lokuthi bazojabula ngoba izibalo zethu zisidweba sicace isithombe sokuthi bayazifela ngonobhutshuzwayo.

“Ngiyazicelela kubafundi ukuba baphume ngobuningi babo ngoba lokhu kwenzelwe bona,” kuphetha uNtuli obonge wanconcoza ngokusukumela phezulu kweSafa nabaxhasi AmaZulu FC nabakwa-Aqualle.

Ngaphandle kwesiteki, miningi eminye imihlomulo ezobe ikhishwa Isolezwe ebhekiswe kubafundi abazobe besenkundleni ngoDisemba 18, neminye yamaqembu yize yona izobe ingewona ukheshi.

Umengameli weSafa eThekwini, uMazwi Mkhize weSafa, ubonge ithimba leSolezwe ngesenzo esihle sokukhumbula abafundi balo wase elishayela ihlombe ngokuhlonipha iSafa.

“Besingeke singasukumeli phezulu uma Isolezwe lisitshela ngomqhudelwano kwazise nalo belilokhu liwa livuka nathi. Ngiyacela kumaqembu ukuthi aziphathe kahle ukuze umqhudelwano uhehe abaxhasi, uye ngokukhula,” kusho uMkhize.

UMchilo Mduba weTigers Black Aces yaseClermont, ezobe iyingxenye yalo mqhudelwano naye ubongile kwiSolezwe ngethuba.

“Ngasohlangothini lwamaqembu azoba ingxenye yomqhudelwano sithanda ukubonga ngethuba eliyingqayizivele lokudlala ngaphansi kwegama lephephandaba elimqoka ngezizathu ezahlukene kithina sonke ngokwahlukana kwethu,” kushaya yena ngamafuphi.

Amaqoqo ami kanje:

Group A: Manning Rangers; Squash FC; Lindelani United.

Group B: Tigers Black Aces; United FC; UMlazi All Stars.

Group C: Molweni FC; Bizzah Academy; Chearians.

Group D: Slow Jam; Leeds United; Pinetown City.

Group E: FC Maphumulo; Ethekwini Coastal; Newlands FC.

Group F: Sakhile FC; Mophela; Fubs FC.

Group G: Inanda Real Stars; Hazelmere FC; Inkunzi United.