SITHEMBISO MKHIZE
UMSHAYIMAGOLI ovelele kwiDStv Premiership, uBradley Grobler, weSuperSport United, ujabhiswe ukungafezeki kwephupho lakhe lokusonga isizini ka-2020/21 evalele enethini amagoli awu-20.
Emcimbini wePremier Soccer League (PSL) obungeSonto wokuklomelisa abenze kahle kwisizini ka-2020/21 yeDStv Premiership, lo mgadli uklonyeliswe ngendondo yeLesley Manyathela Golden Boot, ngokuvalela enethini awu-16.
Ngesizini ka-2019/20, uGabadinho Mhango waseMalawi, odlalela i-Orlando Pirates wacazelana lo mklomelo noPeter Shalulile waseNamibia ngokushaya amagoli ayilesi sibalo. UShalulile wayesadlala kwiHighlands Park.
UGrobler ohlale esembangweni walo mklomelo, ubeqeda ukucanasa kwabangaphandle.
Ngesizini ka-2018/19 wawunqotshwe uMwape Musonda waseZambia, eshaya ayisibalo esifanayo, edlalela iBlack Leopards.
"Ngizizwa ngehlikelwe umthwalo, sekuphele inqwaba yamasizini ngifisa ukunqoba le ndondo. Empeleni ufiswa yiwo wonke umgadli. Noma ngijabule kodwa ngijabhile kancane ngokungafezeki kwephupho lami lokushaya amagoli awu-20. Akwenzekanga lokhu ngenxa yezizathu ezithile. Ngibulawe nawukugeja inqwaba yamathuba abengangifikisa esibalweni ebengisibhekile. Kuzomele lokhu ngikulungise. Nokho kuyajabulisa ukuthi siyawakha amathuba.
"Nakuba ngingafikanga ku-20, kodwa ukunqoba lo mklomelo kuyangigqugquzela ekutheni ngesizini ezayo ngizowuqeda lo mkhokha wokungafiki emagolini awu-20. Ngesizini ezayo ngizolwa ngakho konke, ngithandazela ukuba nesizini enhle."
Ukushaywa kwamagoli awu-20, kwagcina ukwenzeka ngeka-2011/12, enamathiselwa enethini uSiyabonga "Bhele" Nomvethe esadlala kwiMoroka Swallows.
Sekuphele inqwaba yamasizini, abagadlali bamaqembu akuleli behluleka ukuphula irekhodi lamagoli awu-25, elenziwa uCollins Mbesuma waseZambia, ngo-2004/05, edlala kwiKaizer Chiefs.
UMbesuma lo mklomelo waphinde wawunqoba ngo-2015/16, ekuMpumalanga Black Aces, enamathisela enethini awu-14.
UGrobler ozalwa uLes Grobler owadlala kwiMoroka Swallows, uthe isizini ka-2020/21 kayibaphathanga kahle kwi-United.
"Maphakathi nesizini sike salala endaweni yesibili. Sishaywe ukulimala namakhadi. Nakuba singawatholanga amaphuzu ebesiwabhekile kodwa kungijabulisile ukusonga iligi sidlala ibhola elihle. Ngifisa siqhubeke nalo mgqigqo nangesizini ezayo,“ kusho uGrobler.
Amatsatsantsa a Pitori asonge isizini elele kweyesihlanu kwiDStv Premiership ngamaphuzu awu-45.