YIZE AmaZulu FC esalelwe yimidlalo embalwa ukusonga isizini ka-2020/2021 yeDStv Premiership, umengameli wawo uSandile Zungu, ukuqonda kahle ukubaluleka kokuma ngomumo ukubhekana nenselelo yangesizini ezayo. Uthi bazimisele ukuqhubeka nomgqigqo omuhle ngisho kungenzeka ukuthi iqembu lilahlekelwa ngabanye abadlali abamqoka.
UZungu, othathe izintambo ekuphatheni AmaZulu ngaphambi kokuqala kwale sizini, umangaze abaningi ephumela obala ngezinjongo zakhe ezinqala ngeqembu. Phakathi kwezinjongo kubalwa ukulibona liqeda isizini libalwa namaqembu amane aphezulu kwi-log yePremiership.
Nebala, kubukeka sekuya ngawo amagama enkehli njengoba uSuthu kumanje luhlezi endaweni yesibili kwi-log yePremiership, ngamaphuzu angu-40 ngemuva kweMamelodi Sundowns esaqhwakele phezulu ngangu-46.
USuthu oselunqobe imidlalo eyisithupha yeligi ilandelana, luzobuyela ensimini ngokutholana phezulu neSundowns komunye wemidlalo yePremiership obhekwe ngabomvu eJonsson Kings Park Stadium eThekwini, ngoLwesithathu ngo-3 ntambama.
“Kubaluleke kakhulu ukuba nesikwati esibanzi, esiqinile esizokwazi ukubhekana nayo yonke imiqhudelwano isizini yonke. Kuyinto esingeke siyibalekele ukulahlekelwa ngabanye abadlali abamqoka, ngenxa yokuthi iqembu lethu lenza kahle lokho okusho ukuthi amanye amaqembu abagaqele abathembisa okungcono.
“Kodwa okungiqinisa idolo ukuthi sinesikwati esibanzi. Futhi sizokwenza isiqiniseko sokuthi sisiqinisa kakhudlwana isikwati esinaso njengamanje ukuze sikwazi ukubhekana nenselelo yangesizini ezayo, okuyisizini esizimisele ukulwela ukunqoba nanoma yisiphi isicoco, ikakhulu eseligi,” kusho uZungu engxoxweni ekhethekile abe nayo neSolezwe.
UZungu usho kanjena nje, aseqalile ukusabalala amahlebezi okuthi iqembu lingase lilahlekelwe ngabanye abadlali balo abasemqoka ngokuphela kwale sizini. Phakathi kwabo kuvela amagama osiyeSiyethemba Sithebe, noBongi Ntuli, nonozinti uSiyabonga Mbatha.
Nakuba uZungu ethe akekho umdlali abazoma endleleni yakhe kodwa ukugcizelele ukuthi bona njengabaphathi beqembu benza konke okusemandleni ukuqinisekisa ukuthi bayanekekelwa abadlali, ngokuphathwa ntofontofo ukuze bangasiboni isidingo sokushiya iqembu bayojoyina amanye abathembisa okungcono.
“Sifuna AmaZulu abeyindawo lapho abadlali bezibona besekhaya elinokunethezeka, bangasiboni isidingo sokuhalela ukuya kwamanye amaqembu kodwa balwele ukubona iqembu labo lidlondlobala kakhulu kunakuqala. Ngikhuluma nje, abanye babadlali bethu abamqoka sebephumele obala bakubeka ngokucacile ukuthi bazohlala kuleli qembu, abayindawo,” kuqhuba uZungu.
Njengoba ezikaMadl’ibhantshi lakhe, zisethubeni lokuzibekisela indawo emqhudelwaneni weCaf Champions League ngesizini ezayo uma zikwazile ukuqeda endaweni yesibili kwi-log yePremiership, kumbe koweConfederation Cup uma ziqeda endaweni yesithathu, uZungu uthe ezakhe zikulungele ukubhekana nanoma iyiphi inselelo.
“Sikulungele ukudlala kwiCaf, futhi sizosiqinisa ngempela isikwati sethu ukubhekana nalowo mshikashikashika. Sizokwenza isiqiniseko sokuthi siqinisa kuzo zonke izindawo ezimqoka eqenjini, kusukela konozinti kuya kubagadli ukugwema ukuficwa ngamathonsi abanzi uma silinyalelwa ngabadlali abamqoka.”