LIDLULISELWE kumahluleli weSouth African Football Association (Safa) icala elichithwe yiPremier Soccer League (PSL) elithinta iDurban City namaqembu adlala kwiMotsepe Foundation Championship.
ICity eqede ihlezi phezulu kwiChampionship, ayinikezwanga indebe ngemuva kwemidlalo yokugcina yesizini ka-2024/2025 ngempelasonto edlule. IPSL ikuhlehlisile lokhu ngenxa yokuthi iJDR Stars neCape Town Spurs bafake isimangalo besola leli qembu likaFarook Kadodia ebelaziwa ngeMaritzburg United ngokudlalisa uSaziso Magawana engabhalisiwe ngendlela efanele. ISpurs ifake esinye isimangalo ngaphambi kokungena enkundleni neCity ngempelasonto edlule. Okubangwayo wukuthi incwadi ekhulula uMagawana bekufanele ikhishwe yiLeruma eyathenga isitifiketi seMarumo Gallants esesemabhukwini ayo.
Emuva kokuthi ikomiti eliqondiswa ubugwegwe lePSL lisichithe nezindleko isimangalo seJDR, bekubukeka kungasekho okuzovimba imibhiyozo yeCity. Nokho kuvele ukuthi iJDR isidlulele kumahluleli ozimele weSafa. Akucaci ukuthi le nhlangano eyengamele ibhola eMzansi izoluhlalela nini udaba lweJDR ehluleke yancama ukuzibekisela indawo kuma-Play Off okwenyukela kwiBetway Premiership.
Uma iCity ilahlwa yicala, isengcupheni yokwephucwa amaphuzu kuyona yonke imidlalo okudlale kuyona uMagawana, igawulwe yizembe kwiChampionship. Ngaphandle kokuphazamiseka kwenjabulo yeCity, leli cala libeka engcupheni imidlalo yama-Play Off ePremiership. NgokwePSL, le midlalo kufanele iqale ngoLwesibili njengoba kungezeka ngoMgqibelo kucace ngeqembu elizoqeda endaweni ka-15 kwiPremiership, lidlale namabili aqede endaweni yesithathu neyesine kwiChampionship.