UMA konke kuya ngezinhlelo zikaMasipala uMhlathuze, iqembu iRichards Bay FC lizoyidlalela ekhaya eRichards Bay imidlalo yesizini ka-2025/2026.
Leli phephandaba lihoshe ukuthi sekusele kancane iphele inkundla iMhlathuze Sports Complex osekunesikhathi ilindiwe. Nyakenye, umasipala ubize isithangami nabezindaba wathembisa ukuthi uzophela unyaka u-2024 leli qembi likaSifiso "Jomo" Biyela selidlalela kule nkundla. Nokho ugcine uphelile unyaka kungenzekanga lokho. IBay igcine iyidlalela eKing Zwelithini Stadium, eMlaza, imidlalo yasekhaya yesizini ka-2024/2025, okuyinto ebiyizindleko eziphindiwe kubaphathi.
Kuvele ukuthi izikhulu zoMhlathuze sezibhalele iPremier Soccer League (PSL) ukuthi izohlola inkundla ngaphambi kokuvulela amasango iNatal Rich Boyz engakaze idlale ekhaya selokhu yanyuselwa kwiBetway Premiership ngo-2022. Inkundla yavalwa yile nhlangano ikhala ngezinto eziningi ezingekho esimweni esifanele. Isikhulu sePSL, uRonnie Schloss, sakhala ngezindlu zokushintshela zabadlali, amanzi axhaxhazayo, izintambo zikagesi ezazihamba ezindaweni ezingafanele nokunye, esabona kubeka impilo yabantu engcupheni.
Umthombo ongaphakathi eMhlathuze ongavunyelwe ukuphawula kwabezindaba, ukuqinisekisile ukuthi seludumela emasumpeni ngodaba lokuvulwa kwenkundla."Inkundla isiku-95% ukuthi iphele. Sekulindwe iPSL izohlola ukuthi konke kwenziwe kahle yini," kusho umthombo.
Nakuba kuqinisekisiwe ukuthi izikhulu zoMhlathuze zibhalele iPSL mayelana nenkundla kodwa kuvela ukuthi ayikaze iyithinte iBay nakuba iyiqembu elizoyisebenzisa ngesizini ezayo.
UBiyela uthe akukho abasatshelwe khona mayelana nokulunga kwenkundla osekunesikhathi befuna ukubuyela kuyona.
"Sizwile ukuthi sebebhalele iPSL, beyicela ukuthi izohlola inkundla ngaphambi kokuyivula. Ngokwabo sebeqedile ukulungisa, nathi sizwe ngendaba ukuthi isizovulwa,'' usho kanje.
NgoMgqibelo, iBay izikhiphe ngokuphelele otakwini lwezembe ngesikhathi iphuma nephuzu kubakhaya, iLamontville Golden Arrows, emdlalweni ophele zibambene ngo 0-0. Isendaweni ka-11 ngamaphuzu angu-30 emuva kwemidlalo engu-27. IBay izovala isizini ngokubhekana neSuperSport United edinga amaphuzu amathathu ukuze izogwema ukuyodlala ama-Play Off namaqembu amabili ayibamba kwiMotsepe Foundation Championship. Umqeqeshi weBay, uRonnie Gabriel, uthe kungaba yinto enhle ukubuyela ekhaya kweBay, wancoma abadlali ngokulwela iqembu phezu kokuba beyidlalele ekuhambeni yonke imidlalo.
Related Topics: