SITHEMBISO MKHIZE
INTSIKA yaMaZulu FC, uMbongeni Gumede, ijabulela ukuphenduka kwabo izintandokazi kubalandeli baleli qembu athi phambilini bebebadlula endleleni kungabi ndaba zalutho.
Kulezi zinsuku abadlali nabalandeli boSuthu bahambela phezulu ngenxa yempumelelo yakamuva.
USuthu lusendaweni yesihlanu kwi-log yeDStv Premiership ngamaphuzu awu-34. Selunqobe imidlalo emine kulandelana.
NgeSonto luzovakashela iBlack Leopards eThohoyandou Stadium, emdlalweni weligi ngo-3 ntambama.
Okubaluleke kakhulu ngalo mdlalo, uma leli qembu, eliqeqeshwa nguBenni McCarthy, linqobile, lingazithola linyukela endaweni yesithathu.
Lokhu kungaba yizindaba ezinhle, hhayi kubalandeli baMaZulu FC kuphela kodwa kubathandi bebhola KwaZulu-Natal jikelele kwazise neLamontville Golden Arrows yenza kahle njengoba ibambe indawo yesibili kwi-log.
Uma Abafana Be'sthende beshaywe yiSwallows, ngoMgqibelo, eDobsonville, uSuthu luzoba kweyesibili, bona behlele kweyesithathu.
Uma benqobile, basazoqhubeka nokuhlala kweyesibili njengoba bezobe beshoda ngephuzu kwiMamelodi Sundowns eqhwakele ngamaphuzu awu-40.
Ukungadlali kule mpelasonto kweSuperSport United, esendaweni yesithathu, ne-Orlando Pirates ekweyesine, enikela eLibya koweCaf Confederation Cup, yikona okunika ithuba la maqembu aseKZN lokuhlala ngokulandelana phezulu.
UGumede, ofike kuMaZulu ngo-2015, uthe kuyabagqugquzela ukuhlonishwa ngabalandeli babo ngale ndlela.
"Abalandeli bethu bajabule futhi bayabona ukuthi sizama ngakho konke. Uma sihlangana nabo endleleni sebeyasibingelela. Phambilini bebesidlula sengathi abasazi. Ukungabi khona kwabo ezinkundleni kusithikamezile, siyazi ukuthi nabo bebefisa ukuba yingxenye yale mpumelelo yakamuva. Engikucela kubona wukuqhubeka nokuseseka, impi kayikapheli," kubeka uGumede.
Uqhube wathi nempumelelo yozakwabo ngabodwana iyabagqugquzela.
Lapha ubekhuluma ngoMcCarthy, osanda kuhlonishwa ngenkomishi yomqeqeshi wenyanga, noTapelo Xoki odlala emuva, owathola eyegoli le nyanga.
Omunye ngunozinti, uVeli Mothwa, obebizelwe eqenjini lesizwe.
UGumede uthe ngokubuka izinto, maningi amathuba okufezeka kwephupho likamengameli wabo, uSandile Zungu, lokusonga besemaqenjini amane phezulu.
Imidlalo yeDStv Premiership ngempelasonto:
NgoMgqibelo - Ngo-3pm: Swallows v Lamontville Golden Arrows (Dobsonville Stadium).
Ngo-5pm: Maritzburg United v Chippa United (Harry Gwala Stadium); Cape Town City v Baroka (Cape Town Stadium).
NgeSonto - Ngo-3pm: Black Leopards v AmaZulu (Thohoyandou Stadium); Bloemfontein Celtic v TS Galaxy (Dr Petrus Molemela Stadium).