Kuzoshikisha ufudu kweyandulela eyamanqamu yeFifa
Mbappe hospitalised NAKUBA emane amaqembu asele kwiFifa Club World Cup e-United States of America (USA) kodwa kunzima ukuziba ukuhlangana okokuqala kukaKylian Mbappe nePSG
Image: AFP
NAKUBA indawo kowamanqamu weFifa Club World Cup izobangwa ngamaqembu amathathu ase-Europe nelilodwa laseBrazil kodwa kunzima ukuziba isinongo sikaKylian Mbappe kulo mqhudelwano osongwa ngeSonto e-United States of America (USA).
Kuzoqala iChelsea yase-England neFluminense FC yaseBrazil kowandulela owamanqamu wokuqala namuhla ngo-9 ebusuku eMetLife Stadium, eNew Jersey.
IFluminense ikuleli zinga nje yinqoba iqhubekile nokumangaza ngesikhathi ikhipha i-Al Hilal yaseSaudi Arabia kodlule ngamagoli kaMatheus Martinelli noHercules e-Orlando, Florida.
Ukuze iChelsea izibeke ethubeni bekumele idlule kwelinye iqembu laseBrazil iPalmeiras FC ngamagoli oMalo Gusto noCole Palmer.
Kusasa komunye owandulela amanqamu nolindwe ngabomvu kuzobhekana iMadrid yaseSpain neParis Saint Germain (PSG) yaseFrance.
Kulo mdlalo kuzobe kubhekene iMadrid esisidle amahlandla angu-15 isicoco se-Uefa Champions League nePSG okuyiyona esisekhabetheni layo esika-2024/2025.
Kube wubuqhawe bukaMbappe obuweze iMadrid njengoba isizobhekana neqembu lo mgadli ongukaputeni waseFrance alishiya ngesizini edlule.
Ngenxa yokugula, uMbappe akazange awuqale lo mqhudelwano kodwa kube yigoli lakhe eliwinise lezi zinkunzi zaseSpain ngo 3-2 kwiBorussia Dortmund yaseGermany.
Ngokushaya leli goli uMbappe uzifake emlandweni wokuba wumdlali wokuqala nokusenguyena yedwa kwiMadrid oshaye igoli kuyona yonke imiqhudelwano ngesizini eyodwa.
Lo mgadli othandwa umhlaba wonke ubhakuzise inethi kwiSpanish La Liga (31), Copa Del Rey (2), Champions League (7), Spanish Super Cup (1), UEFA Super Cup (1), Intercontinental Cup (1) neClub World Cup (1).
Okusobala wukuthi indaba kaMbappe nePSG ingesinye sezinongo ezibhekwe kakhulu kulo mdlalo kwazise wahamba kungasemnandi eFrance.
Imthandile nokho isizini yakhe yokuqala kwiMadrid ayishayele amagoli angu-44 kuyona yonke imiqhudelwano emidlalweni engu-58.
Ngaphandle kwalokhu, uMbappe uyabalwa kwababebambezele i-PSG okufakazelwa wukuthi ukuhamba kwakhe nezinye izihlabani ebezisemabhukwini aleli qembu laseFrance (Lionel Messi noNeymar) kuqondane nokuqukula kwalo isicoco salo sokuqala kulo mqhudelwano omkhulukazi e-Europe.