IVUSWE emaqandeni ngomlilo iManchester United uCristiano Ronaldo eshoshela kwelinye irekhodi lamagoli bevuliswa ngenduka ka 2-1 uvela kwiYoung Boys kwi-Uefa Champions League.
URonaldo, oshaye ibuya kwi-United kule sizini ngemuva kweminyaka engu-12 ayishiya, ngoLwesibili ebusuku ushaye igoli lakhe lesithathu emidlalweni emibili ebuyile.
Lelo goli aligcinanga ngokubeka i-United phambili kwiYoung Boys abavule ngayo iGroup F yeChampions League ekuhambeni eSwitzerland, kodwa lisondeze uRonaldo emlandweni kwazise usesele ngamagoli angu-19 ukuhamba phambili emlandweni we-United.
Leli rekhodi liphethwe nguWayne Rooney oshiye ebasela angu-253.
Nokho iYoung Boys iphendule ngamagoli amabili kaNicolas Moumi Ngamaleu waseCameroon noJordan Siebatcheu wase-USA, owakhele ephutheni likaJesse Lingard.
Isiphetho kube wukwehlulwa kwe-United nokube yisikhumbuzo ukuthi sekunesikhathi yagcina ukudlala kwiChampions League kwazise kula masizini ambalwa edlule ibisiyiqembu le-Uefa Europa League.
I-United ibuyela enkundleni ngeSonto ntambama neWest Ham United kowePremier League eLondon Stadium, eLondon.