UNOZINTI wakudala we-Orlando Pirates, uThabang Stemmer, uchaze ukusayinisa mawala kweZimnyama njengesitebhisi ebesidingeka ukweqa udonga olubekwe yiMamelodi Sundowns phakathi kwayo namaqembu azama ukuyigudluza esicongweni seligi enkulu yaseNingizimu Afrika.
Kusukela kuvuleke iwindi lokushintshana ngabadlali, alikho iqembu leBetway Premiership eseliqinise isikwati salo ngokhonkolo wabadlali njengePirates.
Izinduku ezintsha zePirates nguYanela Mbuthuma noNkosikhona Ndaba bobabili abasuka kwiRichards Bay FC, Sipho Mbule obesemabhukwini eMamelodi Sundowns, Sihle Nduli obekwiStellenbosch FC, Oswin Appollis wePolokwane City, Tsepang Moremi waMaZulu FC, Masindi Nemtajela osuka kwiMarumo Gallants noSinoxolo Kwayiba obengumgadi weChippa United.
Nakuba liselikhulu igebe iSundowns edle ngalo isicoco seligi yaseNingizimu Afrika kulandelana kodwa iPirates ilinciphisile ngesizini edlule.
Yize leli qembu eseliqede emhlane weSundowns amasizini amabili elandelana lihlukane nomqeqeshi obeyisithandwa, uJose Riveiro, kodwa indlela elisayinisa ngayo abadlali ikhombisa intshisekelo yokugudluza iSundowns ekukhonyeni ebholeni laseMzansi.
UStemmer, owavimba kwiPirates iminyaka emihlanu, uchazekile ngendlela leli qembu elisayinise ngayo kwazise yilokhu ebelishoda ngakho kumasizini adlule ngokusho kwakhe.
“Umehluko phakathi kweSundowns nePirates kumasizini adlule ubusekutheni abadlali abasebhentshini banawo yini amava okushintsha umdlalo,” kusho uStemmmer sakubuza.
“IPirates inaso isikimu esihle sokuqala umdlalo kodwa uma kungahambi ngendlela ehlele ngayo kumasizini adlule ibingabi nazo izimpendulo.
“Bonke laba badlali abasayiniswe yiPirates bangangena begijima esikimini, ngakho-ke nalaba abajwayele ukuqala imidlalo bazohlala ngokwazi ukuthi abanawo uphawini wokuzithambisa.
“Umehluko ngePirates yangesizini ezayo wukuthi isinabo abadlali abazosuka ebhentshini bafike bawukhuphule umdlalo ngoba lokhu yikhona iSundowns ebibacindezela ngakho kwadlule.
“Kulungile kwabazitshela ukuthi ngiyaphupha kodwa indlela iPirates esayinise ngayo abadlali bohlobo oluphambili, ngiyibona isethubeni lokudla isicoco ngesizini ezayo."
Kubhekwe lukhulu kwiPirates yomqeqeshi omusha, u-Abdeslam Ouaddou, ikakhulukazi kwi-MTN8 ebisiyidle amahlandla amathathu kulandelana ngaphansi kwesandla sikaRiveiro kusukela ngo-2022.