STHEMBISO NGOBESE
KULINDELEKE ukuba nangale mpelasonto uqhubeke nokushuba umbango wokunqoba isicoco seGladAfrica Championship nowokuvika izembe emaqenjini agijima kulesi sigaba esiphakela eseDStv Premiership.
Njengoba imidlalo yeGladAfrica isiya ngasemaphethelweni kwazise sekusele imidlalo engaphansi kweyishumi, wonke amaqembu asedlalela ukufa nokuphila njengoba enezinhloso ezingafani.
Phezulu kwi-log ugingqigongqo kumaqembu asembangweni weqhulu, iRichards Bay FC neSekhukhune United abalokhu beshintshana ngokuhlula kule ndawo.
Kuzoyiwa emidlalweni yangempelasonto iBay iqhwakele ngamaphuzu awu-38 emidlalweni ewu-22. I-United iyalandela kweyesibili ngawu-36 emidlalweni ewu-23.
Phakathi nesonto womabili la maqembu ahlulekile ukuqoqa amaphuzu agcwele. INatal Rich Boyz iguqiswe ngo-2-1 yiFree State Stars kungalindele muntu eMhlathuze Sports Complex. ISekhukhune sona sihlulekile ukubuya namaphuzu agcwele sibambana ngo-1-1 neTS Sporting, Kabokweni Stadium, eMpumalanga.
Kulawo alandela ngemuva embangweni, i-JDR Stars neRoyal AM nabo abangazibekile phansi embangweni wesicoco njengoba bekwazile ukuthola amaphuzu amathathu kweyabo imidlalo. IJDR neRoyal AM sebeyalingana ngamaphuzu awu-36 ne-United, sebehlukaniswe amagoli endaweni yesithathu neyesine.
Amaqembu aphezulu kuleli sigaba abanga ukudla ubhedu bese ethola ithikithi eliya ngqo esigabeni esikhulu iDStv Premiership. Abazohlulwa yilokhu bazokhalela kwindawo yesibili neyesithathu ukuze badlale emidlalweni yokuhlungela ukukhuphukela phezulu.
Nasemsileni we-log izinto zishubile njengoba kubalekelwa ukwehlela kwi-ABC Motsepe League.
IBizana Pondo Chiefs eqeqeshwa nguClinton Larsen yiyona esabambe ibhuleki emsileni ngamaphuzu angu-16, iCape Town Spurs isendaweni ka-15 ngamaphuzu angu-23.
Kusasa, la maqembu azongqubuzana ngo-3 ntambama eParow Park Stadium, eKapa. ICape Town All Stars esendaweni ka-13 neSteenberg United esendaweni ka-14 bobabili basabambene ngamaphuzu angu-24.
Ngale mpelasonto, umdlalo ozokube ubhekwe kakhulu kwiGladAfrica ophakathi kwabakhaya iBay noThongathi FC. Umdlalo ukusasa ngo-3 ntambama ePrincess Magogo Stadium, KwaMashu.
Kuzokube kungowamagqubu njengoba ngesikhathi egcina ukuhlangana la maqembu emzuliswaneni wokuqala, iBay ecijwa nguSimo “Govuza” Dladla yanqoba ngo-2-1 kumaCane Cutters aphekwa nguPitso Dladla, emdlalweni owawuseMhlathuze.
Akungabazeki ukuthi iBay izofuna ukuvuka ngomkhaya bayo lapha ukuze iqhubeke nokuhlala esicongweni. UThongathi lona luzokuya kulo mdlalo luhambela phezulu njengoba lusanda kubuya namaphuzu agcwele kulandela ukuqumba phansi kwalo ngo-3-2 i-All Stars emdlalweni obuseKapa.
Imidlalo yeGladAfrica Championship ngempelasonto:
Namuhla: Ngo-3pm: Cape United v Royal AM (Parow Park).
Kusasa: Ngo-3pm: Cape Town Spurs v Pondo Chiefs (Parow Park); Uthongathi FC v Richards Bay (Princess Magogo); Free State Stars v JDR Stars (Goble Park); TS Sporting v University of Pretoria (Kabokweni Stadium).
NgeSonto: Ngo-3pm: Polokwane City v Cape Town All Stars (Old Peter Mokaba); Sekhukhune United v Jomo Cosmos (Makhulong Stadium).