Sibusiso Mdlalose
UMGADLI ongalibheki ipali weLamontville Golden Arrows, uKnox “Mjomana” Mutizwa, uthi bakubeke emahlombe abo njengabadlali beqembu ukuhluleka kwalo ngesizini ephelile ukuzibekisela indawo kwiMTN 8 yangesizini ezayo ka-2020/2021.
UMutizwa (26), ongomunye wabadlali abamqoka nabayizinsika kwi-Arrows, uthi nakuba ekwazile ukushayela iqembu lakhe amagoli amqoka kule sizini ephelile, kodwa akumthokozisi njengoba yena nozakwabo behlulekile ukufaka iqembu ohlwini lwamaqembu ayisishiyagalombili aphezulu kwi-log, obesekuyisizini yesibili kulandelana ngaphansi kukaSteve “Mphathi” Komphela.
Ngesizini ephelile Abafana Bes’thende baqede isizini behlezi endaweni yeshumi nambili kwi-log yePremiership ngaphezudlwana komkhaya babo AmaZulu, nobesekuyisizini yesibili kulandelana leli qembu lihluleka ukungena kuTop 8.
Kusukela leli qembu likhuze ibuya kuPremiership ngesizini ka-2015/2016 lisuka kuNational First Division (NFD) – kulandela ukugawulwa kwalo yizembe ngeka-2013/2014 – bese likwenze injwayelo ukuqeda isizini libalwa namaqembu ayisishiyagalombili aphezulu kwi-log yePremiership. Likwenzile lokho kulandelana ngesizini ka-2016/17 neka-2017/18 liqeda endaweni yesishiyagalombili ku-log yePremiership.
“Kungumsebenzi wami njengomgadli ukushaya amagoli, kodwa akekho umgadli noma umdlali wanoma yiliphi iqembu okujabulelayo ukushaya kwakhe amagoli ekubeni iqembu lakhe lidonsa kanzima ngoba phela wonke umdlali ufuna ukubona iqembu lakhe lenza kahle.
“Nami-ke ngiwashayile amagoli kule sizini ephelile, amanye awo enze umehluko emidlalweni emqoka esiyidlalile.
“Yize ukushaya amagoli kuhlale kuyinto ehlale ingijabulisa ngaso sonke isikhathi njengomgadli, kodwa angijabulanga ngokuphelele njengoba iqembu lingenzanga kahle ngesizini ephelile.
“Zibe ningi zona izingqinamba kule sizini esanda kuphela okubalwa kuzo nokudlala egunqwini (bio-buble), okuyinto ebesingakaze sibhekane nayo ngaphambilini,” kubeka uMutizwa.
Uthe kodwa nabo njengabadlali beqembu kufanele bakubeke emahlombe abo ukungenzi kahle kweqembu kule sizini ephelile.
“Kuyinto evamile ukuthi iminwe ikhombe kuphela umqeqeshi uma iqembu lingenzanga kahle,” usho kanje.
Lo mgadli ogijima naseqenjini lesizwe laseZimbabwe nowahlabana ngomklomelo wokuba yiPlayer of The Tournament emqhudelwaneni weCosafa Cup owanqotshwa yiyo iThe Warriors ngo-2017 udlalelwa eNorth West, ubanga ijezi kuleli qembu lesizwe nezinkalimeva zabagadli
okubalwa kuzo uKnowledge Musona, Tino Kadewere no-Evans Rusike.
UMutizwa obambane noKermit Erasmus, Bongi Ntuli noSamir Nurkovic ngamagoli angu-13 kule sizini ephelile, akakufihli ukulubela kwakhe ukuhlabana ngomklomelo wokuba ngumshayi-magoli ohamba phambili kuPremiership ngelinye ilanga.
“Kuyisifiso sami esikhlulu ukuthi ngelinye ilanga ngihlabane ngeLesley Manyathela Golden Boot Award, futhi kuyangikhuthaza ukuthi isizini nesizini ngiya ngokuya ngithuthuka ekushayeni amagoli, njengoba ngeka-2018/19 ngishaye ayisishiyagalombili kanti kweyandulela leyo bengishaye ayisikhombisa,” kuphetha uMutizwa.
UMGADLI weLamontville Golden Arrows uKnox Mutizwa ogqoke elinokuhlaza nokuphuzi nesikhindi esiphuzi oxinwe kabi nguThaho Mokeke weCapeTown City ongomunye wabagadli abashaye amagoli amaningi kule sizini ufisa ukunqoba isicathulo somdlali oshaye amagoli amaningi okuthiwa yiLesley Manyathela Golden Boot Award
Isithombe: Backpagepix