AmaZulu (0) 0
SuperSport United (0) 0
ISUPERSPORT United yandise izinkinga zaMaZulu FC iwabambela ekhaya ngo-0-0 emdlalweni weDStv Premiership ngoLwesibili, eJonsson Kings Park Stadium, eThekwini.
Amatsatsantsa anyukele endaweni yesibili ngamaphuzu amahlanu emidlalweni emithathu.
USuthu olucijwa wuBenni McCarthy luzoqhubeka nokuhlala kweyesi-15 ngamaphuzu amabili.
Esiwombeni sokuqala bekubonakala ukuthi AmaZulu, angakanqobi kule sizini awadinga womathathu amaphuzu.
Athole amathuba amathathu amahle okungabe kukhulunywa okunye ukube awasebenzisile.
Esiswini bekuyimpi ebiphakathi kukaTebogo Mokoena we-United nomdlali woSuthu uMakhehleni Makhaula, obebonakala engaphezulu ngezinga.
Ubekwazi ukuphakela kahle amabhola uSiphelele Mthembu noThabo Qalinge phambili boSuthu. Kwesokunxele, emuva uSiyabonga Nhlapho wezivakashi, uthwale kanzima ehudulwa uTsepang Moremi okubukeka ezoba ngesinye sezithenjwa sikaMcCarthy uma ezoqhubeka nebhola alikhombise kulo mdlalo.
Emizuzwini engu-20 kuqale umdlalo, uMthembu udlale ukutatazela waze wawa esebhekene nonozinti weSuperSport, uRonwen Williams.
Ibhola liwele ezinyaweni zikaQalinge olishaye eceleni. Ubuyile uQalinge ngoka-25 ethi ulishiya phakathi, lapheshezwa wuWilliams. Ngoka-33 uMoremi uqhamuke ngakwesokunxele, wathi ulishiya phakathi laphuma eceleni.
Isiwombe sesibili sihaqwe yizinkinga zisuka. Sibambezelekile ukuqala ngenxa yezibani ebezingakhanyi kahle.
Kuthe umdlalo usuqalile, kwagqama uqina thambo kuwona womabili amaqembu. Izitobha zeSuperSport, uThatayaone Dithlokwe noLuke Fleurs bathole amakhadi aphuzu. Lesi senzo simdine wathelwa ngamanzi uMcCarthy ozwakale ephendulana kabi nomqeqeshi weSuperSport, uKaitano Tembo.
Ikhadi eliphuzi lilandele ngoXoki waMaZulu obese kuphele isikhathi elizingela. Esinye isigemeko esenzekile esomdlali woSuthu, uTercious Malepe owenze umhlola edlalisa kabi uJamie Webber isidingo singekho.
Akacucuzanga unondweba, uThando Ndzandzeka, wamkhipha ngekhadi elibomvu. Akuphelanga sikhathi esingakanani unondweba waphinde wanika uFleurs elibomvu ngokudlalisa uLuvuyo Memela.
Womabili amaqembu abesethengana, kubonakala ukuthi imimoya iphezulu. Nokho umdlalo ugcine uze waphela kungekho elithola igoli.
Kule sizini kubukeka izinto zigaya ngomunye umhlathi kwezikaMcCarthy osonge edlule endaweni yesibili kwi-log.
NgoMgqibelo kuyaziphoqa ukunqoba kwiBig Bullets yaseMalawi emlenzeni wesibili wokuhlungela ukungena esigabeni samaqoqo eCaf Champions League.
Kowokuqala AmaZulu ashayelwe ekhaya ngo 1-0.
Ngasohlangothini lwe-United, ngeSonto izovakashela iSwallows koweligi eDobsonville Stadium.