ILAMONTVILLE Golden Arrows iphinde yahluleka ukubuyela emgqigqweni wayo eqale ngawo isizini ibanjwa yiBaroka emdlalweni weDStv Premiership eSugar Ray Xulu Stadium, eClermont, izolo ntambama.
I-Arrows, ehlulwe okwesibili kule sizini emidlalweni yeligi iqunjwa phansi yiBlack Leopards ngesonto eledlule, bekulindeleke ukuthi ibuyise umfutho wayo oholele ekutheni idlale imidlalo engu-11 ingahlulwa kule sizini. Umgqigqo omuhle we-Arrows unyomfwe yiCape Town City emasontweni adlule. Izolo kuphinde kwacaca ukuthi Abafana Bes'thende badonsa kanzima ukubuyisa umfutho abaqale ngawo isizini oholele ekutheni baphenduke elinye lamaqembu esatshwayo kwiPremiership.
IBaroka iyona ezinze kuqala, yangena iphindelela ebhokisini le-Arrows. Nokho udonga lwasemuva lwe-Arrows luphumelele ukuyichiliza yonke iminyakazo. Unozinti waBafana Bes'thende, uSifiso Mlungwana, utakule ezakhe echithela ngaphandle i-free kick ebiyingozi kaJoslin Kamatuka ngomzuzu ka-12. Emuva kwalokho, i-Arrows iyibonile ingozi eyicathamelayo, yaqala yangena emdlalweni. Nokho awekho amathuba abephakamisa amaphaphu kwazise iminyakazo eminingi iphelele odongeni lwasemuva lweBaroka.
Esiwombeni sesibili, iBaroka ibuye nomfutho ofanayo neqale ngawo umdlalo, yafaka ingcindezi kwi-Arrows. Nokho Abafana Bes'thende ngokuhamba kwesikhathi bakushintshile konke lokho, bangena ngawo wonke amazibuko befuna igoli. Kodwa ke kucacile ukuthi iBaroka isebenzela ukuphuma nephuzu ngesikhathi unozinti wayo u-Oscarine Masuluke eselala phansi, enza sengathi ulimele, nobekuyimizamo yokuhambisa isikhathi. I-Arrows ibilokhu izame njalo ukuthola igoli kodwa kwanhlanga zimuka nomoya. Womabili amaqembu agcine ehlomule ngephuzu.
Komunye umdlalo weligi obuyizolo eSisa Dukashe Stadium, eMdantsane, iChippa United neCape Town City nabo bashayane baze babukana umdlalo uphela ngo 0-0.
I-LOG YE-DSTV PREMIERSHIP
AmaqembuPWDLFAPts
Sundowns16106026736
SuperSport19964281933
Pirates19883211532
Swallows17791201230
Arrows17782241629
AmaZulu18774241928
CPT City 18675282625
TS Galaxy17575181722
Baroka18567192521
Chiefs17476172019
Celtic18468182218
Chippa17377162016
Stellenbosch16367162115
Tshakhuma1636792015
Maritzburg163310122212
Leopards173311132812