Kuphenduleke imikhuleko yabeChelsea kwiClub World Cup
UJOAO Pedro weChelsea ebanga ibhola nenkakha yaleli qembu kodwa esidlalela iFluminense FC uThiago Silva kowandulela owamanqamau weFifa Club World Cup eNew Jersey e-USA
Image: BACKPAGEPIX
IQINISO elingenakuphikiswa wukuthi iChelsea FC yase-England kayishodi ngakubadlali baphambili kodwa okwenziwe nguJoao Pedro kowandulela owamanqamu weFifa Club World Cup bebhekene neFluminense FC yaseBrazil ngoLwesibili, eNew Jersey, kumnike igunya lokuzibona kumfanele ukuqala owamanqamu.
Lo mgadli waseBrazil oneminyaka engu-23 ubudala ojoyine iChelsea ngesonto eledlule esuka kwiBrighton & Hove Albion, ungumgadli ka-19 othengwe yiChelsea kusukela yawela ezandleni zeziqumama zase-USA ngo-2022.
Sesiside isikhathi iChelsea ipheka ithulula kubagadli kodwa indlela uJoao Pedro azethule ngayo ilokozisa inhlansi yethemba kwabalandela leli qembu ngokutholakala kwempendulo asebeyikhulekele iminyaka.
IChelsea iwine ngo 2-0 wamagoli kaJoao Pedro awanamathisele enethini ngokwahlukana kweziwombe ibhekene neqembu akhulela kulona, iFluminense, ebinoThiago Silva onomlando kwiChelsea enkundleni.
“Iphupho lami lifezekile ngokuthi ngisize iqembu lami elisha lingene kowamanqamu okusibeka ethubeni lokudla isicoco okuyiyona vele into engilethe kwiChelsea,” kusho uJoao Pedro kwi-DAZN ngemuva komdlalo.
Lokhu kufake ompetha be-Uefa Conference League kowamanqamu ongeSonto ebusuku noyedwa kozowina phakathi kweReal Madrid yaseSpain enomlando omuhle ukuwedlula wonke amaqembu ase-Europe emqhudelwaneni wompetha bakhona neParis Saint Germain (PSG) yaseFrance engompetha be-Uefa Champions League.
Umdlalo wamanqamu uzoba kuyona le nkudla iChelsea ishayele khona iFluminense (eMetLife Stadium, eNew Jersey) ngeSonto ngo-9 ebusuku.