KUKHONA abangase baphelewe wumsebenzi kwiMamelodi Sundowns uma kuya ngamazwi kamengameli weqembu uPatrice Motsepe izolo okhiphe isitatimende ebila ngokubophela uTebogo Langerman ohlwini lwabadlali ababezodlala kowamanqamu eNedbank Cup neBloemfontein Celtic emasontweni edlule.
UMotsepe, oqale waxolisa ngalokhu, ukugcizelele ukuthi ngeke nangengozi bakubekezele ubudedengu obufuze lobu eqenjini.
ULangerman wafakwa ohlwini lwabadlali abawu-18 phezu kokuthi wayenamakhadi amane aphuzi okusho ukuthi kwakungafanele nangengozi abalwe njengomdlali wosuku.
Ngokomthemtho weNational Soccer League lokhu kuyicala. Nokho iSundowns igcine iphunyulile ekuhlawulisweni kanzima ngenxa yokuthi umehluleli uthe iCeltic yahluleka wukumangala emizuzwini ewu-30 ngaphambi kokuthi kuqale umdlalo njengokuyelela kwemigomo.
ISundonws yanqoba umdlalo ngo 1-0 yakhala yemuka nesicoco sesithathu ngesizini ka-2019/2020 njengoba ibuye ibe ngompetha beTelkom Knockout neligi.
Esitatimendeni esikhishwe yiSundowns izolo ntambama, uMotsepe uxolisile ngalokhu.
“Ngithanda ukuxolisa kubalandeli nawo wonke amalungu omndeni weMamelodi Sundowns, nakuzona zonke izinhlangano ezithintekayo zebhola, abantu abathanda nabangabalandeli bebhola eNingizimu Afrika, nase-Afrika yonkana, ngokufakwa kukaTebogo Langerman njengomunye wabadlali okuzoshintshwa ngabo ngesikhathi kunomdlalo wamanqamu weNedbank Cup, into engahambisani nemigoko yePSL neyeSafa.
“Njengomengameli weMamelodi Sundowns konke okwenzekayo kusemahlombe ami ngisho ngabe ngiyazi ngakho noma angazi,” kusho uMotsepe.
Uqhube wathi kukhona uphenyo lwangaphakathi abalwenzayo ngalokhu.
Umqeqeshi uPitso Mosimane wazihlangula emuva komdlalo wathi okwenzekile akuhlangene nomsebenzi wakhe.
“Uphenyo lwethu lokuqala luveza ukuthi abaphathi nethimba labaqeqeshi benza obukhulu ubudedengu futhi lesi senzo nokuziphatha akwamukelekile futhi ngeke kubekezelelwe. Kuzoba nokuqondiswa ubugwegwe maduze bese kuthathwa isinqumo esifanele okungasho nokuxoshwa uma izimo nomthetho ukuvuma lokho,” kuqhuba uMotsepe.
Uthe kusemqoka ukuvikela isithunzi negama leqembu.
Akusikhona okokuqala iSundowns izithola ibhekene nokudlalisa umdlali kungafanele. Ngesizini ka-2018/2019 yabophela uWayne Arendse kungafanele kade imlande ezihlweleni ekubeni wayengekho ohlwini lwababezodlala ngalolo suku. Yagcina ihlawuliswe ngokuthi yona nomdlali bakhokhe imali.
“Kumele siqinisekise ukuthi lobu budedengu ngeke bubuye buphinde benzeke,” kuphetha uMotsepe.