KUNGAPHUMA inqanawe yesikimu esingabhincisela nxanye amaqembu anesithunzi kwi-Premier Soccer League (PSL) uma ungahlanganisa abadlali abaphelelwe wumsebenzi njengoba kuqale uJulayi.
Bazofika maduze baze badlule ku-100 abadlali asebededelwe amaqembu abebedlala kuwona njengoba kuvuleke iwindi lokushintshana ngabo ngoJulayi 1.
Amaqembu okubalwa kuwona AmaZulu FC, Marumo Gallants, Sekhukhune neChippa United asebexoshe abadlali abacela kwabangu-70.
La maqembu awakwenzi wodwa lokhu kwazise nalawa athathwa njengamakhulu okukhona kuwona iKaizer Chiefs, Orlando Pirates neMamelodi Sundowns, nawo engazibekile phansi ngokukhuculula.
Kumanje kunamaqembu angazi azothathani ahlanganise nani ukuze aqinise izinti zawo ekubeni bengenawo umsebenzi onozinti abahlanganisa oVeli Mothwa ochithwe AmaZulu, Daniel Akpeyi ogcine ukubonakala kwiChippa, Badra Ali Sangare okhonjwe indlela kwiSekhukhune United.
Kufanele ukuthi akhona amaqembu esisengasebenza kuwona isipiliyoni sezitobha ezifana noRamahlwe Mphahlelwe ongene ezembeni loSuthu, Brian Onyango okhonjwe indlela kwiStellenbosch noVusi Sibiya oxoshwe yiGallants no-Austin Dube okhonjwe indlela yiRichards Bay emasontweni adlule.
Abagadli okukhona kubona uBinevenue Eva Nga, Augustine Mulenga, Ranga Chivaviro noKnowledge Musona, babalwa ohlwini lwabangenawo umsebenzi.
Kwabasesiwini kugqame uMiguel Timm osanda kusuka kwiPirates, Lebohang Maboe noRivaldo Coetzee abebedlala kwiSundowns noMduzuzi Mdantsane ohlukanise neChiefs.
Akubona bodwa laba badlali kepha baningi nabanye njengoba kungakacaci ngesingabala kubona, Percy Tau, ophumele obala emasontweni adlule ngokuthi uvule izandla ngokujoyina iChiefs, Samir Nurkovic okuphele isizini edlule eyibamba kwiSuperSport United, noDino Ndlovu osanda kwehlukana neGallants.
Nakuba bebaningi abadlali abangomantunta nendishi kodwa akhona amaqembu asebachoshile abanye. Kulaba badlali kukhona uPaseka Mako noThabiso Monyane asebethole ikhaya elisha kwiChiefs emuva kokuchithwa yiPirates.
IPirates ihamba phambili ngokusayinisa, ilandelwe yiChiefs yize abalandeli baMakhosi bekhombisa izimpawu zokuthi kabadelile ngalokhu okusenziwe yiqembu labo emakhethe yabadlali.
Related Topics: