South Africa (0) 3
Uganda (1) 2
KUNGENZEKA ukuthi kuqine ithemba ngokubuya kwezinsuku zenjabulo kubathandi bebhola eNingizimu Afrika, iBafana Bafana, yenza engakujwayele, ihlula i-Uganda emdlalweni wobungani e-Orlando Stadium, eSoweto, izolo ebusuku.
Amagoli eBafana ashaywe ngu-Evidence Makgopa (amabili) noBongokuhle Hlongwane esiwombeni sesibili. Awe-Uganda abekwe enethini ngu-Ibrahim Orit no-Abdu Lumala ngokuhlukana kweziwombe.
IBafana isebenzise lo mdlalo ukuzicijela umkhankaso wokuhlungela umqhudelwano weNdebe yoMhlaba ozoqala ngoSepthemba. Leli qembu ebelishaya ngenqwaba yabadlali abebeqala ukudlalela iBafana, lingene enkundleni ngaphandle komqeqeshi omusha uHugo Broos oyogomela iCovid-19 ekhaya eBelgium nephini lakhe uCedomir Jenevski elihaqwe yiCovid-19. Ebhentshini kugcine kuhlezi uHelman Mkhalele oyiphini likaBroos lesibili.
IBafana iqale ngegiya eliphezulu iphaselana ibhola ngokukhululeka. Nokho inkululeko ishabalele ngomzuzu ka-17, ngesikhathi u-Orit engqofela phakathi ibhola ebeligotshwe kwesokudla. Emuva kwaleli goli, iBafana ibonakale iphelelwa wukuzethemba, yaqala yenza amaphutha. Ibilahla ibhola kungenasidingo, ingakwazi nokuhlanganisa amaphasi aya phambili.
Ukaputeni we-Uganda, u-Emmanuel Okwi, ucishe washayela ezakhe igoli lesibili esebhekene nonozinti uRonwen Williams kodwa washaya ibhola laphuma eceleni kwepali emuva kwephutha elenziwe nguNkosinathi Sibisi.
Esiwombeni sesibili, iBafana ibuye nabagadli ababili uMakgopa noThabiso Kutumela ezindaweni, zikaSibisi noDenwin Farmer. Nokho iqhubekile nokucindezela i-Uganda. Ngomzuzu ka-62, uMakgopa uqobele phakathi ibhola ebeligotshwe nguKutumela kwesokunxele. Ngemuva kwemizuzu eyisihlanu, uHlongwane ushayele iBafana elesibili. Sekusele imizuzu eyisishiyagalombili kuphele umdlalo, uMakgopa ushaye elesithathu. ULumala ushayele i-Uganda elesibili ngoka-89.
Ngemuva kwalo mdlalo, sekuzobhekwa uBroos ukuthi yibaphi azoqhubeka ukwakha iBafana ezodlala ezodlala eyokuhlungela eyoMhlaba. Elakuleli liqhathwe neZimbabwe, Ethiopia noGhana. Kumele linqobe leli qoqo ukuze lisale emaqenjini ayishumi okuzophuma kuwo amahlanu azoya eQatar ngo-2022.