ISTELLENBOSCH kungenzeka idlalise okokuqala umgadli waseNigeria, uStanley Dimgba, kwiDStv Premiership uma isisingatha iChippa United ekhaya ngoMgqibelo.
Lokhu kungemuva kokuthi iqembu libikwe kwiTwitter yalo ukuthi usewatholile amaphepha akhe okusebenza kuleli lo mgadli otheleke esuka kwi-Enyimba ngeledlule.
IStellenbosch ecijwa nguSteve Barker iphinde yabika ngabanye abadlali bayo abasha, uPhathutshedzo Nange osuka kwiBidvest Wits nomdlali wasemuva osemncane uMswati Mavuso.
Nabo kuthiwa bakulungela ukudlala.
Abanye ababhekiwe yinjini yase-Argentina uJunior Mendieta nobeyibamba esiswini kwiWits uSolly Khunyedi.
Nabo bangase bawuqale umdlalo ngemuva kokungena besuka ebhentshini behlulwa ngo 1-0 yiSuperSport United.
IStellies ayiqalanga neze kahle kule sizini.