NAKUBA inkundla izovulwa yiDinaledi FC neCoastal United, kodwa akuthandabuzwa ukuthi ukududulana “kwamabutho” phakathi kweWarriors FC naMabutho emdlalweni wesibili yikho okuzothatha amehlo abalandeli emidlalweni yeDStv Compact Cup ezoba seMoses Mabhida Stadium, eThekwini, namuhla ntambama.
IDinaledi neCoastal United bazodlala ngo-3 ntambama.
IWarriors neMabutho bazotholana ngo-6 ntambama. Yonke iseMoses Mabhida Stadium.
IDinaledi izobe icijwa nguDan “Dance” Malesela, iCoastal United icijwe uSteve Barker, iWarriors ikhuzwe nguDylan Kerr, kanti Amabutho wona aholwa ngu-Ernst Middendorp.
Amaqembu amabili azophumelela kule midlalo yanamuhla azozibekisela indawo kowamanqamu ozogijinyelwa eFNB Stadium, eGoli, ngoMgqibelo ozayo.
Okunye okubukeka kuzokwenza le midlalo yeCompact Cup ihlabahlose, ngukubakhona kwabalandeli njengoba kuzovunyelwa abangu-2000 kule midlalo ngokohlelo lweDStv.
Okuzokwenza oweWarriors naMabutho uthathe amehlo wukuthi iWarriors ibophele iningi labadlali beKaizer Chiefs ne-Orlando Pirates, nabambalwa beSwallows FC.
Amabutho abophele abadlali baMaZulu FC, Maritzburg United, Lamontville Golden Arrows neRoyal AM.
Okugqamile eqenjini leWarriors ukuboshelwa kuka-Itumeleng Khune ezintini, ongunozinti weKaizer Chiefs osekunesikhathi eside egcine ukubonakala enkundleni.
Nokho, ukuboshelwa kwakhe ezintini kulo mdlalo weCompact Cup kuyinkomba yokuthi abalandeli bebhola basakholelwa kuye.
Ngaphandle kukaKhune, iWarrios igabe ngezinye izihlabani okubalwa kuzo oHappy “Magents” Jele ongukaputeni, uThabo “Festival” Matlaba, uThembinkosi Lorch noKeagan Dolly.
Kuthi Amabutho agabe ngezihlabani okubalwa kuzo uVeli Mothwa, uNkosinathi “Bhodlela” Sibisi, uLuvuyo Memela, uMakhehleni “Nyembe” Makhaula, noVictor Letsoalo.
Cishe lo mdlalo “wamabutho” ungathathwa njengowesendlalelo, ikakhulukazi kuwo womabili la maqembu agabe ngabadlali basemaqenjini aseGoli nawaseKZN, kwazise ngemuva kwalo mqhudelwano osongwa ngesonto elizayo, luyasuka ushikishi lweNedbank Cup ngempelasonto kaFebhuwari 5-6.
Kanti ngemuva kwalokho zizobe sezibuyela ensimini kweyeDStv Premiership ngoFebhuwari 16.
UJele, ongukaputeni weWarriors, ukubeke ngokusobala ukuthi bafuna ukujabulisa abalandeli kulo mqhudelwano.
“Sifuna ukujabulisa abalandeli futhi siyajabula kakhulu ukuthi basiqokile. Sizizwa sihloniphekile ukuba yingxenye yalo mqhudelwano,” kusho uJele, ophinde abe yisiqongqwane nokaputeni wePirates.
Nokaputeni waMabutho, uMakhaula, uthe:
“Iningi lethu liyazana, futhi lidlala ndawonye, Ngakho-ke ngibona kuzoba lula ukuthi lihlangane iqembu lethu ngaphambi kokuqala kwemidlalo. Sizimisele ukukhombisa abalandeli into yamehlo.”