Izoshintsha indlela esibhekwa ngayo eMzansi - Biyela
SIFISO 'JOMO' BIYELA
Image: sigciniwe
USIHLALO weRichards Bay FC, uSifiso "Jomo" Biyela, ukholwa wukuthi ukungena kwabo kwiMTN8 kuzoyishintsha imiqondo yabaningi abazitshela ukuthi leli qembu liyinto yezembe kwiBetway Premiership.
IBay iqede endaweni yesishiyagalombili kwi-log yePremiership ngemuva kokwehlula iSuperSport United ngo 2-0 emdlalweni wokusonga isizini ePeter Mokaba Stadium, ePolokwane. Ngalokhu, izobhekana neMamelodi Sundowns emqhudelwaneni iMTN8 ekuqaleni kwesizini ka-2025/26. INatal Rich Boyz iqeda kule ndawo nje, ibhinjelwe yizinto maphakathi nesizini yagcina ixoshe umqeqeshi uBrandon Truter obehluleka wukuletha imiphumela egculisayo. Emuva kwalokho, kwengezwe ngoPapi Zothwane ethimbeni labaqeqeshi. Yilapho izinto eziqale khona ukucaca kwiBay, yaqala ukuqoqa amaphuzu. Ngesizini ka-2024/25, iBay iwine imidlalo eyisishiyagalolunye, yadlala ngokulingana kweyisithupha, yahlulwa kwengu-13.
"Okusibeke lapha wukuvuma ukuthi kunenkinga, sathatha isinqumo. Imiphumela iyakufakazela ukuthi bekufanele sishintshe. Sibonile ukuthi iqembu liya ehlathini ekubeni sinabo abadlali. Inselelo ebikhona wukuthi umqeqeshi ubefuna abadlali badlale ngenye indlela ekubeni thina sazi ukuthi abadlali sibasayinisele ukudlala ngendlela yeqembu. Yilokho okudale okungaxhumani. Asikaze sibangabaze abadlali bethu. Emuva kokushintsha, kucacile ukuthi abadlali sinabo. Kudlale bona laba badlali kodwa umehluko wukuthi kade sebesetshenziswa ngendlela efanele," kusho uBiyela.
IBay iqede kwiTop okokuqala kusukela yanyukela kwiPremiership isuka kwiMotsepe Foundation Championship ngo-2022. Ngesizini edlule isinde ezembeni ngokuwina amaPlay Off ewadlale nabaqembu ayibamba kwiChampionship.
"Sijabule kakhulu ngokuqeda kwiTop 8 ngoba cishe wonke amaqembu adlalela ukufika lapho. Ngicabanga ukuthi kuzobagqugquzela abadlali nabaxhasi babone ukuthi kulungile ukuxhasa leli qembu. Ngaphezu kwalokho, kuzoshintsha indlela iRichards Bay ebhekwa ngayo.'
Nakuba iBay isiku-Top 8 kodwa ngokwamaphuzu isengaphazanyiswa yiLamontville Golden Arrows ezoqedela umdlalo wayo neSuperSport United owamiswa ngenxa yokucima kukagesi. Abafana Bes'thende badinga ukwehlula Amatsatsantsa ngamagoli ayisihlanu. IMagesi ezobhekana ne-Orlando Pirates kusasa, nayo idinga ukunqoba ngesibalo esifanayo ukuze ikhiphe iBay kwiTop 8 kwazise zizobe sesibambene ngamaphuzu angu-33.