ITheku lishaye into ecokeme ngecece laseMabhida
abathandi bebhola
Image: Doctor Ngcobo
ISIQUBULO sakudala seTheku esaduma ngenxa yengoma kaProfessor noT'zozo, esithi "Uma ufuna uku-jaiva, woz' eDurban'' sifakazelekile ngempelasonto.
Izindimbane zabantu ebezitheleke kuleli dolobha zizobuka umdlalo wamanqamu weNedbank Cup obuphakathi kweKaizer Chiefs ne-Orlando Pirates, zibheme zakholwa. Izindawo ebezihlelelwe ukubuka lo mdlalo okuyi-Albert Park neSouth Beach, bezigcwele zichichima. Phezu kwezinkulumo ebezisabalele zokuthi kukhona osikhwili-phambana-nobhoko abafuna ukunyomfa le ndumezulu yomdlalo ngenxa yokungawatholi amathikithi kodwa kugcine kungabikwanga zigameko. Kunalokho, kuheleze umoya wokuzwana eThekwini. Ezokuphepha beziqinisiwe ngendlela emangazayo njengoba abaphathi bamaphoyisa bebethembisile. Ukugcwala kwabantu kuleli dolobha akubuzwa ukuthi kushiye aboMnyango wezokuVakasha nosomabhizinisi behleka bodwa kwazise iningi imali eshiywe yizihambeli ebezivunywe nayizulu. Ngaphambi komdlalo, bekuvele ukuthi iTheku libheke ukuthola u-R93 million ozoshiywa yizivakashi.
Okwenzeke enkundleni eMoses Mabhida Stadium, iChiefs yehlula iPirates ngo 2-1, kulethe injabulo kubantu abaningi abagcine beqhubeka nobumnandi ezindaweni zokucima ukoma ezahlukene. Ukusingatha lo mdlalo nenjabulo ebikhona eThekwini, kufanele ukuthi kuzokwenza kube nzima kubaxhasi nakwiPremier Soccer League (PSL) ukulishalazela leli dolobha uma izifundazwe ezahlukene sezibanga ukuthola owamanqamu nemidlalo emikhulu eNingizimu Afrika. Nakuba kuhlala kusuka umsindo ngokuthola imidlalo yamanqamu kweTheku osekwenzeke kabili kule sizini ka-2024/2025 kodwa abaxhasi bahlala bencoma. Ngasekuqaleni kwesizini, eMabhida kudlalwe omamanqamu weMTN8 onqotshwe yiPirates ixebula iStellenbosch, basala beneme abaxhasi okuyiMTN. Ukuqokwa kweTheku amagemugemu, kugcina kubakhonondisa abantu bakwezinye izifundazwe ababona sekubekwa phambili iTheku neKwaZulu-Natal. Yize kunjalo kodwa ekugcineni kucacile ukuthi ubumnandi buseThekwini.
Kumele lishayelwe ihlombe iTheku ngendlela elihlele ngayo icece laseMabhida.