SITHEMBISO MKHIZE
ABAQEQESHI beMamelodi Sundowns bandise amathuba okuvikela izicoco ezanqotshwa uPitso "Jingles" Mosimane ngesikhathi bebhaxabula i-Orlando Pirates ngo-4-1 kowama-quarterfinal eNedbank Cup obuyizolo, eLoftus Versfeld Stadium.
UMosimane washiya kwiSundowns enqobe iTelkom Knockout, Nedbank Cup nesicoco seligi. ITelkom Knockout ayisekho, okusho ukuthi abaqeqeshi abaholwa wuManqoba Mngqithi, sebenethuba lokuvikela iNedbank kanti nakwiligi bazihola phambili.
Amagoli ewelise abafana baseChloorkop izolo avalelwe enethini uPeter Shalulile, Themba Zwane, Lesedi Kapinga nenguzunga yeshodi likaHlompho Kekana.
Elokubika lePirates lishaywe uTshegofatso Mabasa, lenza kwaba ngu-1-1 ngemuva kokuthi uShalulile ebeke iSundowns phambili esiwombeni sokuqala.
Kowandulela owamanqamu, iSundowns izobhekana neTshakhuma Tsha Madzivhandila ngeSonto.
Ziye kulo mdlalo kungaziwa ukuthi iyozala nkomoni ngenxa yebhola elihle elidlalwa yila maqembu.
Esiwombeni sokuqala ukulala kwabadlali bePirates esiswini, uThabang Monare noBen Motshwari, kwenze abadlali beSundowns bachanasa phambili.
Lokhu kubheda kumqhathe kwamqeda uNtsikelelo Nyauza nesitha sakhe u-Aubrey Modiba obegoba amabhola ayingozi ohlangothini lwesokudla lwePirates.
Ingcwenga yokuphaselana phambili, phakathi kukaGaston Sirino, Themba Zwane noShalulile bekushiya uHappy Jele neThulani Hlatshwayo bedidekile odongeni lweZimnyama.
Lokhu kuvuleka kodonga lweBucs kucace bha ngesikhathi uRivaldo Coetzee ephasa ibhola elide elifike kuShalulile walibeka phakathi.
EZimnyama zibona ukuthi kuyonakala zihlanganise ngokushesha isisu nokuholele ekutheni uMabasa alibeke phakathi. Lidaleke emuva komnyakazo omnandi kaDeon Hotto noGabadinho Mhango.
Zicishe zashintsha izinto kodwa zamphika izinto uMhango, elinye lamabhola akhe lishaya ipali.
Okuqhathe eZimnyama nenduku esiwombeni sesibili, wukukhohlwa ukuqhubeka nokuqinisa isisu nokubheda kodonga lwayo.
Ngemuva kwegoli lesibili leSundowns, kubhede kakhulu kunakuqala kwiPirates.
ISundowns bese icobelela eZimnyama ngezifundo zebhola. Kusukela esiswini, uSiphelele Mkhulisi, Sirino, Zwane, Shalulile nabanye, bebenza into yamehlo.
NakwiCaf Champions League iSundowns isanethuba lokuhamba ibanga elide njengoba isifinyelele kuma-quarterfinal.